Ռուսաստանը կօգնի ՆԱՏՕ-ին Աֆղանստանում կարգուկանոն հաստատել

ՌԴ նախագահ Վլադիմիր Պուտինը հայտարարել է, որ Ռուսաստանը մտադիր չէ մասնակցել Աֆղանստանում ռազմական միջոցառումների իրականացմանը, սակայն պատրաստ է Աֆղանստանում կարգուկանոն հաստատելու գործում օգնել ՆԱՏՕ-ին, այդ թվում՝ վերջինիս իր տարածքով տրանզիտի հնարավորություն տալ:
Պատասխանելով այն հարցին, թե Ռուսաստանի համար որքանով է շահավետ Ուլյանովսկում տրանզիտային կետի ստեղծումը, Վլադիմիր Պուտինն ասել է, որ Ռուսաստանի համար շահավետ չէ Աֆղանստանում պատերազմելը:
Կարևորելով Ռուսաստանի հարավային սահմանում խաղաղության պահպանումը՝ Պուտինը նշել է, որ, չնայած ՌԴ-ՆԱՏՕ որոշ տարաձայնություններին, շատ հարցերում, ինչպիսիք են պայքարը ծովահենների կամ ահաբեկիչների դեմ, Ռուսաստանը կհամագործակցի ՆԱՏՕ-ի հետ: «Դա բխում է մեր ազգային շահերից»,-ասել է ՌԴ նախագահը:
Հիշեցնենք, որ ցամաքային փոխադրումների հետ միաժամանակ ՌԴ Կառավարությունը թույլատրել է Ուլյանովսկի տարածքով իրականացնել ՆԱՏՕ-ի միջազգային ուժերի համար նախատեսված երկկողմ օդային բեռնափոխադրումներ, որոնք կարող են սկսվել 2012 թվականի օգոստոսից:
Ավելի վաղ ՌԴ ԱԳՆ-ն նշել էր, որ ՆԱՏՕ-ն հաստատել է ՌԴ առաջարկած պայմաններով համատեղ տրանզիտի իրականացման իր պատրաստակամությունը: Միաժամանակ ՌԴ ԱԳՆ-ն հայտարարել է, որ Ռուսաստանի տարածքում ՆԱՏՕ-ի որևէ ռազմաբազա կամ ռազմական օբյեկտ ստեղծելու մասին լուրերը անհիմն են: