13:53 «Հյուրիեթի» հաղորդմամբ՝ այսօր առավոտյան Հաքյարի նահանգի Շեմդինլի շրջանի Յիղիթլեր գյուղում Քրդական աշխատավորական կուսակցության (ՔԱԿ) զինված ջոկատների դեմ մղած մարտերի հետևանքով զոհվել է թուրքական բանակի 1 փոխգնդապետ, վիրավորվել 6 շարքային:
Ընդհանուր առմամբ՝ հուլիսի 24-ից մինչ այս պահը ՔԱԿ-ի դեմ ուղղված գործողություններում զոհվել է թուրքական բանակի 2, վիրավորվել՝ 10 զինվոր:
12:04 Հաքյարիի Շեմդինլի շրջանում հուլիսի 24-ից շարունակվում են թուրքական զորքերի սկսած մարտական գործողություններն ընդդեմ քուրդ զինյալների:
Քրդական «Rojev» լրատվակայքի հաղորդմամբ՝ քրդական զինված ջոկատները ենթարկվում են թուրքական ինքնաթիռների ու ուղղաթիռների հաճախակի ռմբակոծություններին, որոնց հետևանքով տարհանվել է Գյուզելքայա, Մոսե, Բեյթերան, Գյունյազը քրդական բնակավայրերի բնակչությունը, իսկ շրջանի մյուս բնակավայրերում բնակիչներին արգելված է գիշերը դուրս գալ փողոց:
Մինչդեռ, թուրքական «Sol portal»-ի համաձայն՝ նշված բնակավայրերից բնակչության տարհանման պատճառը անտառային հրդեհներն են, որոնք առաջացել են ռմբակոծությունների հետևանքով։