Թուրքիայի քրդաբնակ շրջաններում «Քրդստանի աշխատավորական կուսակցության» և Թուրքիայի ուժայինների միջև բախումներում այսօր՝ սեպտեմբերի 19-ին, 23:12-ի դրությամբ. ձերբակալվել և բանտ է ուղարկվել 10 մարդ, առգրավվել է PKK-ի զինյալներին պատկանող 4 տոննա պայթուցիկ, զենք, զինամթերք։ Ռազմինֆոն հետևում է իրադարձություններին և թարմացնում օրվա լրահոսը։
Իհլաս. Թուրքիայի հարավարևելյան Հաքքարի նահանգի Շեմդինլի գավառում PKK-ի զինյալներն ինքաշեն պայթուցիկով պայթեցրել են Յայլափնար գյուղի կամուրջը: Զոհեր և վիրավորներ չկան, իսկ կամուրջն ամբողջությամբ շարքից հանվել է:
Դողան. PKK-ի զինյալները նռնականետով հարձակվել են Թուրքիայի հարավարևելյան Սիիրթ նահանգի Սիլվան գավառի Օրմանբաղը գյուղի ժանդարմերիայի տեղամասի վրա: Ուժայինների պատասխան կրակից հետո PKK-ի զինյալները փախել են: Զոհեր և վիրավորներ չկան:
Դողան. Թուրքիայի հարավարևելյան Շանլուրֆա նահանգում ժանդարմերիայի ձեռնարկած հատուկ գործողությունների արդյունքում PKK-ի անդամ լինելու մեղադրանքով ձերբակալվել է 24 մարդ, որից 14-ին հարցաքննությունից հետո ազատ են արձակել, մյուսները դատարանի որոշմամբ ուղարկվել են բանտ։
Դողան. Թուրիքիայի ՆԳ նախարար Սելամի Ալթընօքը հայտարարել է, որ հուլիսի 24-ից PKK-ի դեմ իրականացվող պայքարը շարունակվում է և մինչև վերջ կշարունակվի.
«Վարչապետ Դավութօղլուի հրամանով Թուրքիայի արևելյան և հարավարևելյան շրջաններում անվտանգության ապահովման և պաշտպանական համակարգերը ավելի ազդեցիկ դարձնելու համար, մոտավորապես 5000-ով ավելացնելու ենք մեր ուժայինների թիվը»:
Թուրքիայի գործող նախագահ Էրդողանը կոչ է արել բոլորին մասնակցել ընդդեմ PKK-ի՝ վաղը Ստամբուլում կայանալիք հանրահավաքին։
«Հրավիրում եմ բոլոր քաղաքացիներին միասնական լինել, մեկ ձայն դառնալ ընդդեմ ահաբեկչության». ասել է նա։
Tüm vatandaşlarımızı bir olmaya, birlik olmaya, teröre karşı tek ses olmaya, Yenikapı’ya davet ediyorum. RTE pic.twitter.com/c66KpbeVWW
— Recep Tayyip Erdoğan (@RT_Erdogan) September 18, 2015
Հաքքարիում առգրավվել է զենք, զինամթերք:
Դողան. Թուրքիայի հարավարևելյան Հաքքարի նահանգի համանուն քաղաքի Սեյհան պողոտայում PKK-ի դեմ ուժայինների ձեռնարկած հատուկ գործողության ժամանակ հայտնաբերվել և առգրավվել են 3 նռնականետի նռնակ, 1 ինքնաշեն պայթուցիկ սարք և այլ նյութեր: Դեպքի առթիվ նշանակված դատական քննությունը շարունակվում է:
Դողան. Թուրքիայի հյուսիսարևելյան Թունջելի նահանգի Օվաջըք գավառի Օթլուբահչե և Ասլջա գյուղերի միջև ընկած անտառներում PKK-ի զինյալների դեմ ժանդարմերիայի հատուկ նշանակության ջոկատների ձեռնարկած գործողությունների շնորհիվ PKK-ի զինյալների ապաստարաններում և պահեստներում հայտնաբերվել և առգրավվել է 4 տոննա պայթուցիկ:
Նույն գավառում ուժայինները հայտնաբերել և ոչնչացրել են ճանապարհի վրա տեղադրված 2 պայթուցիկ սարք:
Դողան. PKK-ի զինյալները հրազենով և ականանետով կրակել են Թուրքիայի հարավարևելյան Հաքքարի նահանգի Շեմդինլի գավառի Դերեջիք շրջանում գտնվող Յեշիլովայի սահմանապահ տեղամասի և Ումուրլուի 34-րդ սահմանապահ գումարտակի վրա: Զինվորները պատասխան կրակել են PKK-ի զինյալների վրա:
Հիշեցնենք, որ թուրք-քրդական հարաբերությունների՝ վերջին շաբաթների սրման պատճառը հուլիսի 20-ին Թուրքիայի հարավային Սուրուչ քաղաքում քրդերի դեմ ձեռնարկված ահաբեկչությունն էր, որի համար թուրքական իշխանությունները մեղադրեցին «Իսլամական Պետության» (ԻՊ) զինյալներին, իսկ քրդերը՝ նաև թուրքական իշխանություններին։ Սրան հաջորդեցին Թուրքիայում քրդերի և ԻՊ կողմնակիցների ձերբակալությունները։
Հուլիսի 23-ին ԻՊ ահաբեկիչների կրակոցներից զոհվեց թուրք-սիրիական սահմանում ծառայություն իրականացնող Թուրքիայի ԶՈւ մեկ ենթասպա, ևս երկու զինծառայող վիրավորվեցին, ինչին ի պատասխան թուրքական օդուժը սկսեց Սիրիայում և Իրաքում հարվածել ԻՊ-ի ու նաև «Քրդստանի աշխատավորական կուսակցության» (PKK) դիրքերին: