Ադրբեջանի խորհրդարանի՝ Միլլի Մեջլիսի քննարկմանն է ներկայացվելու «Զինծառյողների կարգավիճակի» մասին օրենքում փոփոխություններ կատարելու առաջարկը՝ ժամկետային զինծառայողների՝ վարչական պատասխանատվության ենթարկման անձեռնմխելիությունից զրկելու համար։ Այս մասին այսօր՝ սեպտեմբերի 18-ին, հայտնում է ադրբեջանական «ԱՊԱ» գործակալությունը։
Ներկայում գործող օրենսդրության համաձայն, զինված ուժերում և պաշտպանական համակարգի այլ կառույցներում ժամկետային ծառայություն անցնող զինծառայողները չեն կարող ենթարկվել վարչական պատասխանատվության՝ ներառյալ վերչական տույժի և վարչական կալանքի։
Եթե առաջարկվող փոփոխություններն արժանանան հավանության, ապա ժամկետային զինծառայողների վրա կտարածվեն պատժի կիրառման բոլոր այն միջոցները, որոնք նախատեսված են Ադրբեջանի «Վարչական իրավախախտումների» օրենսգրքով։
Հավելենք, որ սույն փոփոխությունը քննարկման է առաջարկել Մեջլիսի պաշտպանության և անվտանգության հարցերով հաձնաժողովը։ Քննարկումներն այս թեմայով նախանշված են սեպտեմբերի 30-ին։