Վրաստանում անցկացվել է «Վազիանի-2015» մարտավարական զորավարժությունը (ֆոտո)

Այսօր՝ սեպտեմբերի 11-ին, Վրաստանի Վազիանի զորավարժարանում անցկացվել է մարտավարական դաշտային «Վազիանի-2015» զորավարժությունը, որին մասնակցել են Վրաստանի ԶՈւ ցամաքային զորքերի արևելյան օպերատիվ խմբավորման 5-րդ հետևակային բրիգադի 51-րդ գումարտակի, ինչպես նաև հատուկ գործողությունների ուժերի ապահովման գումարտակի և Մառնեուլիի ավիացիոն բրիգադի ավելի քան 600 զինծառայող։ Այս մասին հայտնում է Վրաստանի պաշտպանության նախարարության մամուլի ծառայությունը։

«Վազիանի-2015» զորավարժության ակտիվ փուլը

Զորավարժության հրամանատար, գնդապետ Գրիգոլ Չալիձեն նախ՝ ներկաներին ներկայացրել է զորավարժության սցենարը, որից հետո սկսվել են ակտիվ գործողությունները։ Սցենարի համաձայն՝ վրաստանցի զինծառայողները չպիտի թողնեին հակառակորդի հիմնական ուժերին ստեղծել պլացդարմ՝ հարձակման հետագա զարգացումով։

Ինչպես նշվում է հաղորդագրության մեջ, վարժանքների ժամանակ կիրառվել են Տ-72 տանկեր, ԲՄՊ-2 հետևակի մարտական մեքենաներ, «Գռադ» համազարկային կրակի ռեակտիվ կայաններ, թուրքական արտադրության «Կոբրա» զրահամեքենաներ, ամերիկյան բազմանպատակային «Իրոկեզ UH1» ուղղաթիռ, Սու-25 գրոհիչներ և այլ զինտեխնիկա։

Զորավարժության հայտարարված նպատակն է եղել զարգացնել բոլոր տեսակի ստորաբաժանումների փոխգործակցությունը, ինչպես նաև զարգացնել «հրամայական-վերահսկողական»( Command and Control) ունակությունները։
Զորավարժության ավարտին ԶՈւ ԳՇ պետ, գեներալ-մայոր Վախթանգ Կապանաձեն գոհ է մնացել ընթացքից, նշելով, որ ստորաբաժանումներն իրենց առջև դրված խնդիրը կատարել են։ Արդյունքերի մասին կհայտարարեն արդեն զորավարժությանը հետևած դիտորդները։

Վրաստանի ԶՈւ Սու-25 գրոհիչը ռումբեր նետելիս

Զորավարժության հյուրերին ներկայացվում է սցենարը

Ամերիկյան բազմանպատակային «Իրոկեզ UH1» ուղղաթիռը

Հավելենք, որ վարժանքներին ներկա էին Վրաստանի պաշտպանության նախարարի տեղակալ Դավիթ Էմբրալիձեն, մի շարք բարձրաստիճան զինվորականներ և հավատարմագրված օտարերկրյա ռազմական կցորդներ։