Ավտովթարի հետևանքով Ադրբեջանում մահացել է 1 զինծառայող, ևս 1-ը վիրավոր է

Ադրբեջանի Լենքորան քաղաքում սեպտեմբերի լույս 10-ի գիշերը գրանցվել է ավտովթար, ինչի հետևանքով զոհվել է զինված ուժերի մեկ զինծառայող, ևս մեկը ստացել է մարմնական վնասվածքներ։ Այս մասին հայտնում է ադրբեջանական Report լրատվական գործակալությունը։

Վթարի ենթարկված Opel Astra ավտոմեքենան

Աղբյուրը նշում է, որ ճանապարհի երթևեկելի գոտուց դուրս է եկել Մամեդլի Ռամին Գիյամեդդին օղլուի (Məmmədli Ramin Qiyaməddin oğlu) վարած Opel Astra մակնիշի ավտոմեքենան և բախվել ճանապարհամերձ ծառին։

Մեքենայի վարորդ՝ 1981 թվականին ծնված Մամեդլին, հիվանդանոց տեղափոխելու ճանապարհին մահացել է։ Վթարի հետևանքով տուժել է նաև մեքենայի ուղևոր 1990-ին ծնված Ումիդով Ռասիմ Նովրուզ օղլուն ( Ümidov Rasim Novruz oğlu)։ Գործակալությունը նշում է նաև, որ մահացածը ծառայում էր զինված ուժերի զորամասերից մեկում և ուներ ենթասպայի կոչում։ Իսկ վիրավորը եղել է նրա ծառայակիցը։

Դեպքի առթիվ Ադրբեջանի զինդատախազությունն անցկացնում է հետաքննություն։

Հավելենք, որ 2015 թվականի սեպտեմբերին սա ադրբեջանական բանակում գրանցված և հայտնի դարձած 5-րդ մահվան դեպքն է։