Օգոստոսի 26-ին Թուրքիայի հարավային Հաթայի նահանգում տեղի ունեցած մեքենայի պայթյունի հետևանքով մահացել է «Սիրիական Ազատ բանակ» ապստամբական կազմակերպության խմբավորումներից մեկի պարագլուխ Ջեմիլ Ռադունը։ Այս մասին հայտնում է թուրքական «Անադոլու» գործակալությունը։
Թուրքիայում «Սիրիայի ազատ բանակի» պարագլուխներից մեկի պայթեցված մեքենան
Հաթայի նահանգապետ Էրջան Թոպաջայի տված տեղեկությունների համաձայն՝ պայթյունից հետո սիրիացի հրամանատարին տեղափոխել են հիվանդանոց, սակայն նրա կյանքը չի հաջողվել փրկել։
Նույն աղբյուրի համաձայն Ջեմիլ Ռադունը եղել է Սիրիայի զինված ուժերի փոխգնդապետ, իսկ այնուհետ անցել է «Սիրիական Ազատ բանակի» շարքերը և տեղեփոխվել է Թուրքիա։
Նահանգապետը տեղեկացրել է նաև, որ սիրիացի ապստամբի նկատմամբ ևս մեկ անհաջող մահափորձ է կատարվել դեռևս 2015թ. մարտի 3-ին։ Այն ժամանակ հաջողվել է հայտնաբերել և վնասազերծել մեքենայի վրա տեղադրված պայթուցիկը։
Դեպքի մանրամասները ճշտելու համար հետաքննությունը շարունակվում է։