ԱՄՆ-ն 20 մլն դոլար ռազմական օգնություն կտրամադրի Վրաստանին

Վրաստանի պաշտպանության նախարար Թինաթին Խիդաշելին օգոստոսի 15-ին մեկնել էր ԱՄՆ, որտեղ մի քանի հանդիպում էր ունենալու երկրի ռազմական ղեկավարության հետ: Օգոստոսի 18-ին Խիդաշելին հանդիպել է ԱՄՆ պաշտպանության քարտուղար (նախարար) Էշթոն Քարտերին: Այս մասին տեղեկացնում է Պենտագոնը:

ԱՄՆ պաշտպանության քարտուղար Էշթոն Քարտերի և Վրաստանի պաշտպանության նախարար Թինաթին Խիդաշելիի հանդիպումը Պենտագոնում

ԱՄՆ պաշտպանության քարտուղար Էշթոն Քարտերի և Վրաստանի պաշտպանության նախարար Թինաթին Խիդաշելիի հանդիպումը Պենտագոնում

ԱՄՆ պաշտպանության քարտուղար Էշթոն Քարտերը և Վրաստանի պաշտպանության նախարար Թինաթին Խիդաշելին Պենտագոնում՝ ԱՄՆ ԶՈւ միացյալ շտաբի նախկին պետ, գեներալ Ջոն Շալիկաշվիլիի նկարի առջև

ԱՄՆ պաշտպանության քարտուղար Էշթոն Քարտերը և Վրաստանի պաշտպանության նախարար Թինաթին Խիդաշելին Պենտագոնում՝ ԱՄՆ ԶՈւ միացյալ շտաբի նախկին պետ, գեներալ Ջոն Շալիկաշվիլիի նկարի առջև

Հանդիպման ընթացքում ամերիկյան կողմը հավաստիացրել է, որ նախատեսում է իր դաշնակիցներին աջակցելու ծրագրով Վրաստանին տրամադրել 20 միլիոն ամերիկյան դոլար ռազմական օգնություն:

Բացի այդ, Քարտերը նշել է, որ ամերիկյան կողմը մտադիր է այսուհետ ևս շարունակել վրաստանյան զինված ուժերի հետ համատեղ երկկողմ և բազմազգ զորավարժությունների ու վարժանքների անցկացումը:

Ամերիկյան կողմը նաև նշել է, որ Վրաստանի հետ համագործակցությունը շարունակելու է նաև Վրաստան-ՆԱՏՕ ձևաչափով: Կողմերը քննարկել են նաև վրաց-ամերիկյան ռազմական համագործակցության այլ ոլորտներ, ինչպես նաև տարածաշրջանային անվտանգության խնդիրները:

Մինչ այդ Վրաստանի պաշտպանության նախարար Խիդաշելին և Վրաստանի ԶՈւ գլխավոր շտաբի պետ, գեներալ-մայոր Վախթանգ Կապանաձեն հանդիպել են նաև ԱՄՆ պետքարտուղարի օգնականի տեղակալ Ջեյմս Ռոդրիգեսին, ում հետ քննարկել են վարստանցի վիրավոր զինծառայողների՝ ԱՄՆ-ում վերականգնողական կուրսեր անցնելու հարցեր: Ամերիկյան կողմը, կարևորելով վերականգնման կուրսերի ժամանակ սպորտի դերը, պատրաստակամություն է հայտնել ոլորտի մասնագետներ ուղարկել Վրաստան՝ տեղացի զինվորականներին վերապատրաստելու համար: (Նշենք, որ վրացական կողմն իր վիրավոր զինծառայողների վերականգնողական կուրսեր անցկացնելու վերաբերյալ պայմանավորվածություն ունի նաև Հայաստանի հետ, հունիսին վրացական կողմին այս առաջարկն արել է ՀՀ ԶՈւ՝ Վրաստան այցելած պատվիրակությունը):

Ավելի վաղ պաշտպանության նախարարը հանդիպել է նաև ԱՄՆ պետքարտուղարի՝ Եվրոպայի և Եվրասիայի հարցերով օգնական Վիկտորյա Նուլանդի և պետքարտուղարի՝ ռազմաքաղաքական հարցերով տեղակալ Փունիթ Թալվարի հետ: Կողմերը քննարկել են ինչպես երկկողմ համագործակցությունը, այնպես էլ Վրաստանին տրված համագործակցության նոր փաթեթի (NATO-Georgia substantial package) կատարումը (փաթեթի գլխավոր նպատակը Վրաստանին ՆԱՏՕ-ին անդամակցելու գործում նախապատրաստելն է):

Վրաստանի պաշտպանության նախարար Թինաթին Խիդաշելիի հանդիպումը ԱՄՆ պետքարտուղարի օգնական Վիկտորյա Նուլանդի հետ

Վրաստանի պաշտպանության նախարար Թինաթին Խիդաշելիի հանդիպումը ԱՄՆ պետքարտուղարի օգնական Վիկտորյա Նուլանդի հետ

Հիշեցնենք, որ Հյուսիսատլանտյան Դաշինքի՝ Ուելսի գագաթաժողովում Վրաստանին տրված համագործակցության նոր փաթեթի (NATO-Georgia substantial package) շրջանակներում հուլիսին Վրաստանում անցկացվել է ՆԱՏՕ-ի բազմազգ Agile Spirit 2015 զորավարժությունը:

Վարժանքի ընթացքում Վրաստանի, Ռումինիայի, Բուլղարիայի և ԱՄՆ զինծառայողները բնակելի վայրում մարտական գործողություն են իրականացրել, գրոհով վերցրել պայմանական հակառակորդի զբաղեցրած բնագծերը, զինծառայողների մի մասին գերի են վերցրել։

Իսկ ավելի ուշ՝ օգոստոսի 26-27-ին, Վրաստան է այցելելու ՆԱՏՕ-ի գլխավոր քարտուղար Յենս Ստոլտենբերգը՝ նույն փաթեթի իրականացման շրջանակում Վրաստանում ՆԱՏՕ-ի հետ համատեղ ռազմական ուսումնական կենտրոն բացելու համար:

One response to “ԱՄՆ-ն 20 մլն դոլար ռազմական օգնություն կտրամադրի Վրաստանին

  1. Pingback: Ռազմաշաբաթ. Վրաստան. 16-22 օգոստոսի, 2015 | Ռազմ.info

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *