«Միություն-2015. Հաղթանակի ժառանգներ-Հայաստան» միջազգային երիտասարդական ռազմամարզական կրթական մրցույթ-հավաքի շուրջ հինգ հարյուր մասնակիցների համար օգոստոսի 17-ին ազդարարվել է հավաքի մեկնարկը: Այս մասին տեղեկացնում է ՀՀ ՊՆ կայքը:
«Միություն-2015. Հաղթանակի ժառանգներ-Հայաստան» միջազգային երիտասարդական ռազմամարզական կրթական մրցույթ-հավաքի մասնակիցները
Բացման հանդիսավոր արարողությանը մասնակցել է նաև ՀՀ պաշտպանության նախարարության Սեյրան Օհանյանը, ով իր խոսքում նշել է. «Սա խորհրդանշում է բոլոր ազգությունների ամբողջականությունը, ինչպես 70 տարի առաջ, երբ մեր պապերն ու նախապապերը իրենց միասնության շնորհիվ կարողացան կասեցնել ընդհանուր վտանգը, հաստատել ապագայի իրենց իրավունքը»:
Մասնակիցներին ողջունել է նաեւ ԱՊՀ անդամ պետությունների պաշտպանության նախարարների խորհրդի քարտուղար Ալեքսանդր Սինայսկին: Նա նշել է, որ ԱՊՀ երկրների ռազմական համագործակցությունը խորհրդի ուշադրության կենտրոնում է, և տարվա ընթացքում կազմակերպվում են թե զորավարժություններ, թե հավաքներ, թե մրցումներ՝ ուղղված կառույցի անդամ պետությունների անվտանգության ապահովմանը և կապերի ամրապնդմանը:
Հավաքի բացմանը մասնակցել և մասնակիցների ողջունել է ՀՀ պաշտպանության նախարարը
Հայկական հատուկ նշանակության ջոկատի ցուցադրական ելույթը
Հայաստանից մրցույթին մասնակցում են Մոնթե Մելքոնյանի անվան ռազմական վարժարանը, ԵԿՄ-ի, Փոքր Մհեր և Տիգրան Մեծ կրթահամալիրները և Իվանյանի անվան ռազմամարզական վարժարանը (Արցախ):
Ավանդույթի համաձայն՝ միջոցառմանը ներկա Հայրենական մեծ պատերազմի վետերանները Գեորգևյան ժապավեններ են հանձնել դասակների հրամանատարներին՝ հայկական բանակի ապագա սպաներին:
Միջոցառումն ուղեկցվել է «Զորական», «Սարդարապատ» համույթների երաժշտական կատարումներով և ավիացիոն ու հատուկ ստորաբաժանումների զինծառայողների ցուցադրական ելույթներով:
Ավելացնենք, որ ռազմամարզական հավաքին մասնակցում են նախկին ԽՍՀՄ-ի 14 երկրների ռազմական վարժարանների սաներ, ովքեր մրցելու են տարբեր ռազմամարզական մրցույթներում՝ խառը դասակներով: Այսինքն դասակները կազմված են լինելու ոչ թե ազգային թիմերից, այլ տարբեր երկրների սաներից:
Հավաքին մասնակցելու համար հայկական կողմը հրավիրել է նաև Ադրբեջանի ռազմական վարժարանների սաներին, սակայն ադրբեջանական կողմը հրավերին չի արձագանքել:
Հայրենական մեծ պատերազմի վետերանները Գեորգևյան ժապավեններ են հանձնում հավաքի դասակների հրամանատարներին
Հայկական ստորաբաժանման հանդիսավոր երթը հավաքի բացման արարողության ժամանակ