Մինչև իրանական տարվա ավարտը՝ 2016թ. մարտ, Իրանի զինված ուժերի ցամաքային զորքերն անցկացնելու են վեց զորավարժություն, որոնցից մեկը՝ տեղական արտադրության հրթիռներով: Այս մասին լրագրողների հետ հանդիպման ժամանակ հայտնել է Իրանի ԶՈւ ցամաքային զորքերի հրամանատար, բրիգադի գեներալ Ահմեդ Ռեզա Փուրդաստանը։
Իրանի ցամաքային զորքերը զորավարժության ժամանակ
Ըստ զորահրամանատարի՝ զորավարժություններից երկուսն անցկացվելու են առաջիկա աշնանը, մեկը՝ երկրի արևմտյան նահանգներում, մյուսը՝ արևելյան: Իսկ տեղական արտադրության հրթիռներով մասնագիտացված զորավարժությունն անցկացվելու է տարվա վերջին:
Հրթիռային մասնագիտացված զորավարժության, հրթիռների փորձարկման մասին հայտարարել է նաև Իրանի զինված ուժերի միացյալ շտաբի պետ, գեներալ-մայոր Հասան Ֆիրուզաբադին: Այս հայտարարությունը իրանցի գեներալն արել է այն բանից հետո, երբ Իրանի խորհրդարանի պատգամավորները կոչ են արել վերսկսել հրթիռների փորձարկումները:
Իրանյան Fars News լրատվական գործակալությունը հրթիռային սպառազինության փորձարկումների կոչերը կապում է ՄԱԿ անվտանգության խորհրդում Իրան-վեցյակ համաձայնության քննարկման հետ: Ըստ լրատվամիջոցի՝ ԱԽ-ն իր բանաձևում նշել է, որ Իրանը 8 տարի շարունակ չպետք է նախագծի և փորձարկի միջուկային մարտագլխիկներ կրելու ունակ բալիստիկ հրթիռներ:
Սակայն իրանական կողմը նշում է, որ իրենց բալիստիկ հրթիռները նախատեսված չեն միջուկային մարտագլխիկներ կրելու համար:
Ավելացնենք, որ Իրանի միջուկային ծրագրի վերաբերյալ հուլիսի 14-ի՝ Իրան-վեցյակ համաձայնությամբ՝ իրանական կողմի համար հրթիռային սպառազինության և տեխնոլոգիաների ներկրման արգելքները շարունակվելու են ևս 8 տարի: