ԱՄՆ-ն հերքել է Սիրիայում Թուրքիայի հետ անվտանգության գոտի ստեղծելու մասին տեղեկությունը

ԱՄՆ պետքարտուղարությունը  հերքել է Սիրիայի հյուսիսում Թուրքիայի հետ «անվտանգության գոտի» ստեղծելու վերաբերյալ համաձայնագիր կնքելու մասին Թուրքիայի փոխարտգործնախարար Ֆերիդուն Սինիրլիօղլուի հայտարարությունը։ Այս մասին օգոստոսի 11-ին՝ ամենօրյա ճեպազրույցի ընթացքում, հայտարարել է պետքարտուղարության խոսնակ Մարք Թոները, հաղորդում է պետքարտուղարության պաշտոնական կայքը։

Ինջիրլիք ռազմաբազա

Ըստ թուրքական «Ilhas Haber» լրատվական գործակալության օգոստոսի 11-ին հրապարակած նյութի՝ Թուրքիայի փոխարտգործնախարարը հայտնել է ԱՄՆ հետ կնքած համաձայնագրի մասին։ Նա մանրամասնել է, որ «անվտանգության գոտին» ունենալու է 98 կմ երկարություն և 45 կմ խորություն, նախատեսված է Սիրայի գործող վարչակարգի դեմ պայքարող «Սիրիայի ազատ բանակ» զինյալ խմբավորման համար։

Այդ հայտարարության վերաբերյալ լրագրողի հարցին ԱՄՆ պետքարտուղարության մամուլի քարտուղար Մարք Թոները պատասխանել է. «Մենք խոսել ենք միայն տարածաշրջանում ԻՊ-ն չեզոքացնելու համար երկարատև պայքար տանելու մասին»։

Հիշեցնենք, որ Թուրքիան միացել է ԻՊ-ի դեմ ԱՄՆ գլխավորած կոալիցիային, վերջինիս օդուժին տրամադրելով երկրի հարավարևելյան Ինջիրլիք ավիաբազան՝ ահաբեկչական կազմակերպության հենակետերին օդային հարվածներ հասցնելու նպատակով։