Իրան-Ռուսաստան ծովային վարժանքներ Կասպից ծովում

Իրանի և Ռուսաստանի ռազմածովային հարաբերությունների զարգացման նպատակով ՌԴ Կասպյան նավատորմիղի երկու ռազմանավեր օգոստոսի 8-ին կայանել են Կասպից ծովի իրանյան Էնզելի նավահանգստում: Այս մասին տեղեկացնում է իրանական Press TV լրատվակայքը:

ՌԴ Կասպյան նավատորմիղի «Վոլգադոնսկ» և «Մախաչկալա» ռազմանավերը Իրանի Էնզելի նավահանգստում. օգոստոս 2015

Երեքօրյա այցելության ընթացքում Ռուսաստանի ռազմանավերի 130-հոգանոց անձնակազմը նախատեսում է նաև վարժանքներ իրականացնել իրանյան ռազմածովային ուժերի հետ: Այս մասին լրատվամիջոցին տեղեկացրել է ՌԴ տորմիղի հրամանատար, առաջին կարգի կապիտան (գնդապետ) Կիրիլ Տարանենկոն:

Ռուսաստանյան ռազմանավերի այցից հետո՝ 2015-ի հոկտեմբերին, իրանական կողմը նախատեսում է իր ռազմանավերն ուղարկել ՌԴ նավահանգիստներ այցի:

Իրանական լրատվամիջոցը նշում է, որ սա ռուսաստանյան ռազմանավերի երրորդ այցն է Իրան: Մինչ այս այցեր եղել են 2007-ին և 2014-ին: Նախորդ տարվա հոկտեմբերի այցի ընթացքում ՌԴ ռազմանավերը նույնպես զորավարժություն են անցկացրել իրանական ռազմածովային ուժերի հետ:

Նշենք, որ 2014 սեպտեմբերին Ռուսաստանի Աստրախան քաղաքում Կասպից ծովի ավազանի 5 երկրների ղեկավարների չորրորդ գագաթաժողովում քննարկվել էին մի շարք հարցեր՝ ջրային տարածքների սահմանազատումից մինչև ռազմածովային համագործակցություն։ Հենց այդտեղ էլ ՌԴ նախագահ Վլադիմիր Պուտինն Իրանին, Ղազախստանին, Թուրքմենստանին և Ադրբեջանին առաջարկել էր 2016 թվականին համատեղ զորավարժություններ անցկացնել։

Գագաթաժողովից հետո՝ հոկտեմբերին, ՌԴ Կասպյան նավատորմիղի 2 ռազմանավ Մախաչկալայից ուղևորվել են Ղազախստանի Աքթաու նավահանգիստ՝ համատեղ ռուս-ղազախական զորավարժության, որի ավարտից հետո շարժվել են Իրան։ Ուղևորության վերջնակետն է եղել Բաքուն։

Ուշագրավ է, որ Ադրբեջանի պաշտպանության նախարարությունն ՌԴ ռազմանավերի այցը ներկայացրել է որպես բացառիկ երևույթ, «մոռանալով» նշել, որ ռազմանավերի համար Բաքուն ընդամենը հետդարձի մի կետ է եղել, ընդ որում Ադրբեջանի հետ զորավարժություններ ռուսաստանյան ռազմանավերը չեն իրականացրել՝ ի տարբերություն Ղազախստանի և Իրանի։

Ավելացնենք, որ բացի իրանյան այցը, ՌԴ Կասպյան նավատորմիղը մինչ այս տարվա վերջ Կասպից ծովում կանցկացնի առնվազն 2 միջազգային զորավարժություն, որոնցից մեկը՝ եռակողմ՝ Ադրբեջանի և Ղազախստանի ռազմածովային ուժերի հետ, իսկ մյուսը՝ երկկողմ՝ ռուս-ադրբեջանական: