Օգոստոսի 7-ից 8-ը ՀՀ պաշտպանության նախարար Սեյրան Օհանյանը ՀՀ ԶՈւ ԳՇ պետի տեղակալ, գեներալ-լեյտենանտ Հայկազ Բաղմանյանի, 3-րդ բանակային զորամիավորման հրամանատար, գեներալ-մայոր Օնիկ Գասպարյանի ուղեկցությամբ այցելել է հյուսիսարևելյան սահմանագոտի: Այս մասին այսօր՝ օգոստոսի 10-ին, տեղեկացնում է ՀՀ ՊՆ կայքը:
Սահմանագոտում տեղակայված զորամասերում նախարար Օհանյանը ծանոթացել է ծառայության կազմակերպմանը, զինծառայողների մարտական ու մասնագիտական պատրաստությանը, սոցիալ-կենցաղային պայմաններին և իրականացվող շինարարական աշխատանքներին: Ստուգվել են նաև զորամասերի զինվորական ճաշարանների շենքային և սանիտարահիգիենիկ վիճակը, զինծառայողների սննդի որակն ու չափաբաժինները:
Պաշտպանության նախարարը եղել է նաև մարտական հենակետերում, տեղում ծանոթացել է ամրաշինական և ինժեներական կառույցների հուսալիությանը, ստուգել է մարտական հերթապահություն իրականացնող զինծառայողների պարտականությունների իմացությունը, շրջել է խրամատներում և կատարել է սահմանագծի դիտարկում: Ծառայության մեջ աչքի ընկած և իրենց պարտականություններին լավագույնս տիրապետող զինծառայողներին Սեյրան Օհանյանը խրախուսական նվերներ է հանձնել:
Այցի ընթացքում զորամիավորման և զորամասերի հրամկազմի հետ քննարկվել են մարտական պատրաստությանը, առաջնագծում առկա իրավիճակին, զինծառայողների կենցաղային պայմաններին և ընթացող շինարարական աշխատանքներին առնչվող մի շարք հարցեր: Սեյրան Օհանյանը հրամկազմին տվել է համապատասխան ցուցումներ և հանձնարարականներ` ընթացող աշխատանքներն ըստ սահմանված ժամանակացույցի և առավել արդյունավետ իրականացնելու ուղղությամբ:
Պաշտպանության նախարարը հանդիպել է նաև սահմանամերձ մի շարք համայնքների ղեկավարների և բնակիչների հետ:
Pingback: Նախարար Օհանյանն այցելել է Տավուշի զորամասերից մեկը | Ռազմ.info
Pingback: ՀՀ ՊՆ-ում ամփոփվել են 3-րդ բանակային կորպուսի գործունեության արդյունքները | Ռազմ.info