Ռազմաշաբաթ. Թուրքիա. 2-8 օգոստոսի, 2015

Փոխվել է Թուրքիայի ԶՈւ ԳՇ պետը, արվել են նաև մի շարք այլ նշանակումներ • Քրդական PKK-ն մի քանի հարձակում է իրականացրել թուրքական ուժային կառույցների ծառայողների վրա • Թուրքիան զրահատեխնիկա է կուտակում Սիրիայի սահմանին • Թուրքիան և ԱՄՆ-ն ԻՊ դեմ սկսել են նոր ռազմական գործողություն • Թուրքիան Ռուսաստանում մասնակցելու է ռազմարդյունաբերական ցուցահանդեսների

Թուրքիայի ԶՈւ ԳՇ նորանշանակ պետը՝ բանակի գեներալ Հուլուսի Աքարը

• Օգոստոսի 3-4-ին Թուրքիայի ԶՈւ ԳՇ նոր պետ է նշանակվել երկրի ցամաքային զորքերի հրամանատար, բանակի գեներալ Հուլուսի Աքարը։ Եղել են նաև այլ նշանակումներ։

• Օգոստոսի 2-ին PKK քուրդ մահապարտը տրակտորի մեջ լիցքավորված 2 տոննա պայթուցիկ նյութերով մոտեցել է Թուրքիայի ժանդարմերիայի հենակետին և պայթեցրել մեքենան։ Արդյունքում սպանվել է Թուրքիայի 2 զինծառայող, ևս մոտ 30-ը վիրավորվել են: Նույն օրը PKK զինյալները Շըրնաք նահանգում հարձակվել են երկրի ԶՈւ ռազմական մեքենայի վրա. զոհվել է 2 զինծառայող, վիրավորվել՝ 1 զինծառայող և 1 գյուղացի։ PKK զինյալները մեղադրվում են նաև Թուրքիայի ԶՈւ՝ Իրաքի և Սիրիայի սահմաններին մոտ, հարավային Սիլոփի քաղաքում տեղակայված 172-րդ զրահատանկային զորամասի ուղղությամբ հրթիռ արձակելու համար, որի արդյունքում 1 զինծառայող մահացել է, 1-ը՝ վիրավորվել։ Թուրք-քրդական ևս 1 բախում է եղել օգոստոսի 7-ին։ 4 ժամ տևած փոխհրաձգության ժամանակ սպանվել է PKK երեք անդամ, ծանր վիրավորվել՝ 1 ոստիկան։

• Թուրքական զինված ուժերը Սիրիայի հետ սահմանային Սըրնաք նահանգի Ջիզրե գավառում զրահատեխնիկա և մասնավորապես տանկեր ու զրահամեքենաներ են կուտակում: Սիրիական սահմանամերձ տարածքը վերահսկում են քրդական PYD կուսակցության զինված թևը՝ YPG-ը, որի դիրքերին թուրքական օդուժը հարվածել է օրերս։

Թուրքական զրահատեխնիկան զբաղեցնում է Շըրնաք նահանգում Սիրիայի հետ սահմանին տեղակայված բլուրները. օգոստոս 2015

• Թուրքիայի արտգործնախարար Մևվլութ Չավուշօղլուն հուլիսի 5-ին հայտարարել է, որ «Իսլամական պետություն» ահաբեկչական կազմակերպության դեմ նոր գործողություն սկսելու նպատակով ամերիկյան ռազմական ինքնաթիռներ ու անօդաչու սարքեր են տարվել Թուրքիայի «Ինջիրլիք» ռազմաբազա, իսկ օգոստոսի 4-ին ամերիկյան ԶՈւ պատկանող անօդաչու թռչող սարքը առաջին անգամ Սիրիայի հյուսիսում հարվածներ է հասցրել ԻՊ խմբավորման դիրքերին:

• Թուրքիաական ընկերությունները սեպտեմբերի 9-12 մասնակցելու են Ռուսաստանի Նիժնի Տագիլ քաղաքում անցկացվելիք Russia Arms Expo 2015 (RAE-2015) միջազգային ռազմարդյունաբերական ցուցահանդեսին, իսկ օգոստոսի 25-ից 30-ը՝ Մոսկվայում անցկացվելիք «ՄԱԿՍ-2015» ավիացուցահանդեսին։

Ռազմաշաբաթը նաև՝

Հայաստանում

Ադրբեջանում

Վրաստանում