«Քրդստանի աշխատավորական կուսակցության» (PKK) զինյալները մեղադրվում են օգոստսոսի 4-ին Թուրքիայի ԶՈւ՝ Իրաքի և Սիրիայի սահմաններին մոտ, հարավային Սիլոփի քաղաքում տեղակայված 172-րդ զրահատանկային զորամասի ուղղությամբ հրթիռ արձակելու համար։
PKK զինյալներ
Թուրքիայի ԶՈւ ԳՇ կայքի փոխանցմամբ՝ հարձակման հետևանքով վիրավորվել է 2 զինծառայող։ Վերջիններիս ուղղաթիռով տեղափոխել են Շըրնաք նահագի ռազմական հոսպիտալ։ Նրանցից մեկը մահացել է։
Հիշեցնենք, որ երեկ Շըրնաքի Ուլուդերե գավառում PKK զինյալները հարձակվել էին նաև երկրի ԶՈւ ռազմական մեքենայի վրա. զոհվել էր 2 զինծառայող, վիրավորվել՝ 1 զինծառայող և 1 գյուղացի։ Իսկ երեք օր առաջ նմանատիպ հարձակում էր եղել նաև Աղրը արևելյան նահանգում. արդյունքում զոհվել էր 2, վիրավորվել՝ 30-ից ավելի զինծառայող։ Այս գործողության կազմակեպման համար ևս մեղադրվում է PKK-ն։
Նշենք, որ վերջերս թուրք-քրդական հարաբերությունները կրկին սրվել են, երբ հուլիսի 23-ին «Իսլամական պետություն» ահաբեկչական խմբավորման գրոհայինների կրակոցների հետևանքով զոհվել է թուրք-սիրական սահմանագծի Քիլիս քաղաքի շրջանում ծառայություն իրականացնող Թուրքիայի ԶՈւ մեկ ենթասպա, ևս երկու զինծառայող վիրավորվել են։
Այս միջադեպից հետո Թուրքիայի զինված ուժերը բախման շրջան ուղարկեցին զրահատեխնիկա և հատուկ նշանակության ստորաբաժանում։ Դրանից զատ թուրքական զինուժը ԻՊ-ի դիրքերին ավիահարվածներ էր հասցրել F-16 կործանիչներով։ Հուլիսի 25-ին և 26-ին մի քանի անգամ ավիահարվածներ են հասցրվել նաև Իրաքում տեղակայված PKK ստորաբաժանումների դիրքերին։ Ավիահարվածները PKK-ի 6 դիրքերին շարունակվել են նաև հուլիսի 28-29-ին։
Թուրքիայի զինված ուժերն ավիահարվածներ են հասցրել քրդական PKK-ի դիրքերին
Հավելենք, որ «Քրդստանի աշխատավորական կուսակցությունը» (Partiya Karkerên Kurdistan կամ PKK) քրդական կազմակերպություն է, որի հիմնական նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքներում քրդական անկախ պետության հիմնումը: Այն հայտնի է նաև մի շարք այլ անուններով, այդ թվում նաև HPG անունով։
Կազմակերպությունը հիմնադրվել է 1978 թվականին Դիարբեքիրում Աբդուլլահ Օջալանի (Ափո) կողմից, ով ներկայում ցմահ ազատազրկում է կրում թուրքական Իմրալը կղզու բանտում, սակայն շարունակում է համարվել կազմակերպության ղեկավարը։