Հայաստանում ռուսաստանյան ռազմաբազայում մեկնարկել են զորավարժություններ

Ռուսաստանի զինված ուժերի հարավային ռազմական շրջանի Հայաստանում տեղակայված 102-րդ ռազմաբազայի հետախույզները զորավարժություն են անցկացնում։ Այս մասին այսօր՝ օգոստոսի 4-ին, հայտնում է ռուսաստանյան «ՌԻԱ Նովոստի» լրատվական գործակալությունը՝ հղում անելով հարավային ռազմական շրջանի մամուլի ծառայությանը։

102-րդ ռազմաբազայի դիպուկահարներից
Նկարը՝ ՌԴ ԶՈւ ՀՌՕ մամուլի ծառայության

Ըստ լրատվական գործակալության՝ հարավային ռազմական շրջանի զինծառայողները նմանատիպ զորավարժություն են անցկացնում նաև Հյուսիսային Օսիայի, Կարաչայ-Չերքեզիայի, Ստավրոպոլի երկրամասի և Վոլգոգրադի 5 զորավարժարաններում։ Վարժանքներին ներգրավված են ավելի քան 1300 զինծառայող, 300 միավոր հատուկ տեխնիկա։

Նշվում է նաև, որ զորավարժություններն անցկացվում են մարտականին մոտեցված պայմաններում։

ՌԴ ԶՈւ ռադիացիոն, քիմիական և կենսաբանական պաշտպանության ստորաբաժանման զինծառայողներ

Հավելենք նաև, որ Հայաստանում ռուսաստանյան ռազմաբազայի զիծառայողները ներգրավված են նաև մեկ այլ զորավարժության։ Ռադիացիոն, քիմիական և կենսաբանական պաշտպանության ստորաբաժանման շուրջ 150 զինծառայող մեկ ամսվա ընթացքում վարժանքներ է իրականացնելու։

Զինծառայողները մեկ ամսվա ընթացքում աշխատելու են վերոնշյալ ստորաբաժանման հաստիքային զինատեսակներով, սովորելու են դրանց ճիշտ կիրառման ձևերը։