Տանկային բիաթլոն. Առաջին թիմերի պայքարում Հայաստանի թիմը 3-րդ տեղում է

Օգոստոսի 1-ին Մոսկվայի «Ալաբինո» զորավարժարանում մեկնարկած Տանկային բիաթլոնի առաջին անհատական մրցույթում Հայաստանի առաջին թիմը մյուս երկրների առաջին թիմերի հետ պայքարում զբաղեցրել է 3-րդ տեղը:

Տանկային բիաթլոն 2015 մրցույթին մասնակցող ՀՀ ԶՈւ 1-ին տանկային անձնակազմի տանկը մրցման ժամանակ

Օգոստոսի 3-ին Հայաստանի առաջին թիմի տանկիստները մրցել են երրորդ խմբում ընդգրկված երկրների՝ Հնդկաստանի և Չինաստանի թիմերի հետ և եռյակում զբաղեցրել են 1-ին տեղը՝ 29 րոպե 47 վայրկյան արդյունքով:

Իսկ բոլոր 13 երկրների առաջին թիմերի հաշվարկով՝ Հայաստանը զիջել է Ղազախստանի (27ր 19վ) և Ռուսաստանի (28ր 31վ) առաջին թիմերին:

Առաջին թիմերի մրցույթից հետո մրցաշարային աղյուսակը դասավորվել է հետևյալ հերթականությամբ.

Հայկական թիմի կազմում եղել են ավագ լեյտենանտ Աշոտ Մալխասյանը (հրամանատար), շարքային Վահե Քոչարյանը (նշանառու օպերատոր) և շարքային Գևորգ Շմավոնյանը (մեխանիկ-վարորդ):

Օգոստոսի 3-ին մրցել են նաև Սերբիայի, Նիկարագուայի, Վենեսուելայի և Տաջիկստանի երկրորդ թիմերը: Մասնավորապես Սերբիայի երկրորդ թիմը շրջանը հաղթահարել է 28 րոպե 52 վայրկյանում, ինչով առաջ է անցել հայկական առաջին թիմից:

Հնդկաստանի, Չինաստանի և Հայաստանի առաջին տանկային թիմերը մրցում են նույն մրցաշարային եռյակում՝ C խմբում

Հայաստանի և մյուս երկրների 2-րդ և 3-րդ թիմերի մրցումներն անցկացվելու են օգոստոսի 4-ից 6-ը, ինչից հետո՝ օգոստոսի 13-ին կանցկացվեն էստաֆետային (փոխանցումավազք) մրցումները, որոնց ներգրավված կլինեն երկրների 3-ական թիմեր: Մրցույթի արդյունքում կընտրվեն եզրափակիչ անցած թիմերը, իսկ եզրափակիչն էլ կանցկացվի օգոստոսի 15-ին:

Ավելացնենք, որ Տանկային բիաթլոնն այս տարի ընդգրկված է առաջին անգամ անցկացվող «Միջազգային բանակային խաղեր» մրցաշարի մեջ: Բիաթլոնին մասնակցում է 13 երկիր, որոնց թվում և Հայաստանը:

Տանկային բիաթլոնի մասին ավելի մանրամասն կարող եք կարդալ «Այն ամենը, ինչ պետք է իմանալ տանկային բիաթլոնի մասին» հոդվածում: