Այսօր՝ հուլիսի 31-ին, ՌԴ-ում ավարտվել է ԱՊՀ պետությունների ԶՈւ առաջին ռազմամարզական խաղերը։ Միջոցառման ավարտին ՌԴ պաշտպանության նախարարի տեղակալ Արկադի Բախինը հայտարարել է, որ հաջորդ տարի խաղերն անցկացվելու են Հայաստանում, ու հայաստանյան պատվիրակության ղեկավարին է հանձնել խաղերի դրոշը։ Այս մասին հաղորդում է ռուսաստանյան ՌԻԱ Նովոստի լրատվական գործակալությունը՝ հղում անելով իր թղթակցին։
Արկադի Բախինը հույս է հայտնել, որ այսպիսի միջոցառումներն իրենց ներդրումը կունենան ԱՊՀ պետությունների համագործակցության գործում։
Հուլիսի 25-ին մեկնարկած առաջին ռազմամարզական խաղերին մասնակցել է Հայաստանի, Ռուսաստանի, Ղազախստանի, Բելառուսի, Ղրղզստանի, Տաջիկստանի զինված ուժերի 228 զինծառայող։
Մրցույթի ընթացքում մասնակից երկրների զինծառայողները մրցել են 10 սպորտաձևերում, որոնցից 6-ը ռազմամարզական, այդ թվում՝ կրակային և մենամարտային վարժաձևեր, ինչպես նաև ձյուդո, լող, սպորտային կողմնորոշում և մարզաքարերի բարձրացում:
Ռազմամարզական խաղերի անցկացման վերաբերյալ որոշումն ընդունել են ԱՊՀ երկրների պաշտպանության նախարարները՝ ԽՍՀՄ ժողովուրդների Հայրենական մեծ պատերազմում տարած հաղթանակի 70-ամյակի նշանավորման համար: Խաղերի նպատակն է բարձրացնել մասնակից անձնակազմի ֆիզիկական պատրաստվածության մակարդակը: