Վրաստանի պաշտպանության նախարար Թինաթին Խիդաշելին մեկ շաբաթ անցկացնելու է զինված ուժերում և ապրելու է զինվորական օրակարգով։ Խիդաշելին արդեն գնացել է զինված ուժերի ցամաքային զորքերի արևմտյան օպերատիվ խմբավորման ռազմաբազաներից մեկը (դեռևս չի հստակեցվում, թե որ մեկը)։ Այս մասին այսօր՝ հուլիսի 27-ին, հայտնում է Վրաստանի պաշտպանության նախարարության մամուլի ծառայությունը։
Վրաստանի պաշտպանության նախարարն ու զինծառայողները
Ինչպես նշվում է հաղորդագրության մեջ, Խիդաշելին այցելելու է Բաթումիի, Սենակիի, Խոնիի, Սաչխերեի, Քութաիսիի ռազմաբազաները, մարզվելու է զինծառայողների հետ և սնվի նրանց սննդակարգով։ Այցելությունների ժամանակ անցկացվելու են նաև անվտանգության թեմայով դասախոսություններ։
Տեղեկացնենք, որ արևմտյան օպերատիվ հրամանատարության տակ են՝
- Բաթումիում տեղակայված հետևակային առանձին թեթև գումարտակը
- Սենակիում՝ հետևակային II բրիգադը և Ազգային գվարդիայի 10-րդ կադրային հետևակային բրիգադը
- Խոնիում՝ Հրետանային II բրիգադը
- Սաչխերեում՝ լեռնային պատրաստության դպրոցը
- Քութաիսիում՝ Հետևակային III բրիգադը
Վրաստանի պաշտպանության նախարարության մամուլի ծառայությունը հայտնում է նաև, որ Խիդաշելիի հետ ռազմաբազաներում մնալու են նաև հեռուստաօպերատորներ։
Pingback: Վրաստանցի զինծառայողները կվերապատրաստվեն Ֆրանսիայում. Վրաստանի պաշտպանության նախարար | Ռազմ.info
Pingback: Ռազմաշաբաթ. Վրաստան. 26 հուլիսի – 1 օգոստոսի, 2015 | Ռազմ.info