ԻՊ-ի գրոհայինների և թուրքական բանակի բախման հետևանքով սպանվել է Թուրքիայի ԶՈւ զինծառայող

Հուլիսի 23-ին «Իսլամական պետություն» ահաբեկչական խմբավորման գրոհայինների կրակոցների հետևանքով զոհվել է թուրք-սիրական սահմանագծի Քիլիս քաղաքի շրջանում ծառայություն իրականացնող Թուրքիայի ԶՈւ մեկ ենթասպա, ևս երկու զինծառայող վիրավորվել են: Այս մասին հայտնում է Թուրքիայի ԶՈւ ԳՇ կայքը:

Թուրքիայի ԶՈՒ զրահատեխնիկան պատասխան կրակ է բացում ԻՊ դիրքերին. նկարը` «Դողան» գործակալության

Նշվում է, որ դեպքը գրանցվել է Թուրքիայի ԶՈւ ցամքային զորքերի առաջին սահմանային գնդի ստորաբաժանումներից մեկի պահպանության տակ գտնվող տարածքում:  Հավելենք, որ նշված սահմանային գունդը տեղակայված է Գազիանթեփ նահանգի Օղուզելի գավառի տարածքում:

Ըստ Թուրքիայի ԶՈւ գլխավոր շտաբի տեղեկության` «Իսլամական պետություն» ահաբեկչական խմբավորման գրոհայինները կրակ են բացել Սիրիայի տարածքից, ինչի հետևանքով  Թուրքիայի ԶՈւ մեկ ենթասպա զոհվել է, վիրավորվել են` 2 պրոֆեսիոնալ ավագ սերժանտ:

Թուրքիայի զինված ուժերին հաջողվել է գերի վերցնել թուրքական դիրքերի ուղղությամբ կրակող ԻՊ գորահայիններից մեկին, ինչպես նաև առգրավել 1 միավոր ականանետ և 1 միավոր ԱԿ-47 ինքնաձիգ:

Թուրքական «Դողան հաբեր» լրատվական գործակալության հաղորդմամբ` Սիրիայի Հալեպ նահանգի Չոբանբեյ գյուղի շրջակայքից ԻՊ 5 գրոհայինները կրակել են թուրքական բանակի զինծառայողների ուղղությամբ: 3 ժամից ավել տևած մարտի ընթացքում թուրքական զինուժը կարողացել է սպանել ԻՊ գրոհայիններից մեկին:

Զոհվել է Թուրքիայի ԶՈւ 1, վիրավորվել` 4 զինծառայող: Թուրքիայի զինված ուժերը բախման շրջան է ուղարկել զրահատեխնիկա և հատուկ նշանակության ստորաբաժանում: Լրատվական գործակալությունը տեսանյութ է հրապարակել միջադեպի վայրից, որտեղ երևում է, որ Թուրքիայի զինված ուժերը գործի են դրել տանկեր` ԻՊ-ի դիրքերին հարվածելու համար: