Ռամզան Քադիրովը հայտարարում է, որ Չեչնիան չի կարող դառնալ ԻՊ-ի համար բազա

Հուլիսի 15-ին Չեչնիայի ղեկավար Ռամզան Քադիրովը չնախատեսված ստուգումներ է իրականացրել հատուկ ստորաբաժանումներում՝ ստուգելով ուժայինների օպերատիվ-մարտավարական առաջադրանքներ կատարելու հմտությունները։ Այս մասին հայտնում է ռուսաստանյան ՏԱՍՍ լրատվական գործակալությունը՝ հղում անելով իր թղթակցին։

Չեչնիայի նախագահ Ռամզան Քադիրովը ստուգումներ անելիս

Չեչնիայի նախագահ Ռամզան Քադիրովը ստուգումներ անելիս
Նկարը՝ ТАСС գործակալության

Ստորաբաժանումների պատրաստությունը ստուգելուց հետո Քադիրովը հատկապես շեշտել է, որ Չեչնիան «չի եղել և չի լինի «Իսլամական պետություն» ահաբեկչական խմբավորման բազա»։

«Մենք լսում ենք նրանցից (ԻՊ-ից-Ռազմինֆո), որ Հյուսիսային Կովկասում բացել են իրենց մասնաճյուղերը և որ իրենց գործունեությունն ընդարձակվում է։ Ես ուզում եմ հավաստել, որ այդ «անիծվածները» ոչնչի հույս չեն կարող ունենալ, և Չեչնիայի հանրապետությունում նրանց ո´չ բազա, ո´չ մասնաճյուղ և անգամ «հոտը» չի կարող լինել»,—հայտարարել է Քադիրովը։

Քադիրովը կարևորել է փոքրաթիվ խմբերի դեմ կռվելու կարողությունը, այդ թվում նաև՝ միայնակ գործող ահաբեկիչների դեմ։ Վերջինս շեշտել է  ՌԴ-ի կազմում գտնվող հանրապետություններում գործող ուժային կառույցների դերը, նշելով, որ հենց նրանք պիտի առաջին հերթին ապահովեն իրենց անվտանգությունը և թույլ չտան, որ արևմտյան հատուկ ծառայությունները խառնվեն տարածաշրջանում իրենց գործերին և սադրանքների դիմեն։

Հարկ է ավելացնել, որ ընդամենը վերջերս՝ հունիսի 21-ին, «Կովկասյան հանգույց» լրատվամիջոցը հայտնել էր, որ «Կովկասի Էմիրություն» ահաբեկչական խմբավորման զինյալները հավատարմության երդում են տվել ԻՊ առաջնորդ Աբու Բաքր ալ Բաղդադիին։

Տեղեկացնենք, որ «Կովկասի էմիրություն» խմբավորումը ստեղծվել է 2007 թվականին։ Խմբավորման ղեկավարը համարվում է «Կովկասի մոջահեդների ամիր», «ջիհադի առաջնորդ», իսկ «Կովկասի էմիրությունը» «միակ օրինական իշխանությունն է, որտեղ կան մոջահեդներ»։

Հյուսիսային Կովկասը, այդ թվում նաև Դաղստանը, Չեչնիան, Կաբարդինա-Բալկարիան և մյուս հանրապետությունները, ահաբեկչական, ինչպես նաև զինված ընդհարումների կենտրոն են դարձել, որի դեմ փորձում են պայքարել Ռուսաստանի իշխանությունները։

2 responses to “Ռամզան Քադիրովը հայտարարում է, որ Չեչնիան չի կարող դառնալ ԻՊ-ի համար բազա

  1. Pingback: Չեչնիայում դարձյալ մարտական տագնապով ոտքի է հանվել հատուկ նշանակության գունդը | Ռազմ.info

  2. Pingback: ՌԴ ՆԳ նախարարի տեղակալը Չեչնիայում ստուգել է հատուկ նշանակության գնդի պատրաստության աստիճանը | Ռազմ.info

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *