ՌԴ արտաքին գործերի փոխնախարար Օլեգ Սիրոմիլոտովը ԵԱՀԿ գագաթնաժողովի մեկօրյա նիստի բացման ելույթի ժամանակ հայտարարել է, որ Սիրիայում՝ «Իսլամական պետություն» ահաբեկչական կազմակերպության շարքերում, կռվում է ՌԴ 2200 քաղաքացի, իսկ ահաբեկիչներին միացած եվրոպացիների թիվը գերազանցում է 10000-ը: Այս մասին հայտնում է ռուսաստանյան «ՌԻԱ Նովոստի» լրատվական գործակալությունը:
«Իսլամական պետություն» ահաբեկչական խմբավորման գրոհայիններ
Սիրոմոլոտովն իր անհանգստությունն է հայտնել այն կապակցությամբ, որ չի վերահսկվում ահաբեկիչների վերադարձը, և վերջիններս, Սիրիայում ծավալած պայքարից հետո վերադառնալով, կարող են լրջագույն խնդիրներ ստեղծել նաև այն երկրների համար, ուր վերադառնում են։
«Ահաբեկչության դեմն առնելու համար անհրաժեշտ է գտնել դրա աճի պատճառները: Իսկ այդ պատճառներից մեկն այն է, որ որոշ պետություններ, ելնելով քաղաքական շահերից, արմատական խմբավորումներին օգտագործում են որպես գործիք՝ իրենց համար ոչ ձեռնտու ռեժիմ ունեցող պետություններում անկայունություն ստեղծելու և դրա միջոցով այդ պետությունների ներքին գործերին խառնվելու համար»,-հավելել է փոխարտգործնախարարը՝ որպես անկույունության օջախի օրինակ նշելով Մերձավոր Արևելքն ու Հյուսիսային Աֆրիկան:
Նշենք, որ մեծ է նաև Հարավային Կովկասից, մասնավորապես՝ Վրաստանից և Ադրբեջանից ԻՊ-ին միացողների թիվը: Այս երկրները խնդիր ունեն ոչ միայն վերահսկելու իրենց քաղաքացիներին և կանխելու վերջիններիս միացումը ահաբեկչական խմբավորումներին, այլև որպես տարանցիկ ուղի՝ պարտավորություն ունեն վերահսկել Ռուսաստանից և Միջին Արևելքի իսլամական պետություններից ներթափանցող և Մերձավոր Արևելք անցնել ցանկացող ծայրահեղականների տեղաշարժը:
Հավելենք, որ սիրիական հակամարտության ընթացքում հայտնի է դարձել արդեն մահացած 13 վրաստանցու մասին, որոնցից 12-ը եղել են Պանկիսիի կիրճից (Ախմետի շրջան), 1-ը՝ Աջարիայից։
Սիրիայում կռվող ամենահայտնի վրաստանցին (նույնպես Պանկիսիի կիրճից) Թարխան Բատիրաշվիլին է, նույն ինքը՝ Ումար ալ Շիշանին (Շիշանին արաբերեն Չեչնիան է)։ Բատիրաշվիլին Սիրիայում «Իսլամական պետության» խմբավորման հայտնի հրամանատարներից է։ Դեռ 2014-ին ԱՄՆ-ն Բատիրաշվիլուն ներառել է ԻՊ-ի հետ կապ ունեցող ամենավտանգավոր 11 ահաբեկիչների ցանկում, իսկ նրա մասին տեղեկության դիմաց պատրաստ է վճարել 5 մլն ԱՄՆ դոլար։
Ինչ վերաբերում է Ադրբեջանին, ապա ԻՊ շարքերում կռվող ադրբեջանցիների մասին աղբյուրները հավաստի չեն, սակայն նպաստում են ադրբեջանցիների՝ իսլամիստական խմբավորումներին անդամակցելու թեմայի ընդհանուր պատկեր կազմելուն: Օրինակ, 2014-ի հոկտեմբերին համացանցում տեսագրություն էր տարածվել, որտեղ, ադրբեջանական մամուլի հավաստիացմամբ, ներկայացված էին Թուրքիային սահմանակից Սիրիայի Հալեպի շրջանի Քոբանի քաղաքի վրա հարձակվող ԻՊ-ի զինյալների, որոնց թվում կան նաև ադրբեջանցիներ:
Բացի այդ, շուրջ մի քանի տասյակ մարդու նկատմամբ Ադրբեջանի Ազգային անվտանգության նախարարությունը հարուցել է քրեական գործեր՝ Սիրիայում և Իրաքում ահաբեկչական խմբավորումների շարքերում կռվելու կամ դրանց անդամակցել փորձելու կապակցությամբ։