[Լրացված] Ադրբեջանցի երկու զինծառայող հատել են հայ-ադրբեջանական սահմանը. Ադրբեջանի ՊՆ

Այսօր՝ հունիսի 23-ին, Ադրբեջանի զինված ուժերի պայմանագրային երկու զինծառայող հատելով հայ-ադրբեջանական սահմանը Ղազախի հատվածում (սահմանակից է Տավուշի մարզին) հայտնվել են Հայաստանի տարածքում։ Այս մասին հայտնում է Ադրբեջանի ՊՆ մամուլի ծառայությունը։

Հաղորդագրությունում նշվում է նաև սահմանը հատած զինծառայողների տվյալները. նրանք են կրտսեր սերժանտ Մուսաև Մուսա Սաբիր Օղլուն և կրտսեր սերժանտ Յոլչուև Թուրալ Սահիբ օղլուն։ Ըստ ադրբեջանական վարկածի, զինծառայողները Հայաստանում են հայտնվել «սխալմամբ՝ մոլորվելով լեռնաանտառային գոտում»։

Նշենք, որ ՀՀ պաշտպանության նախարարությունից Ռազմինֆոյի հարցմանն ի պատասխան հայտնեցին, որ միջադեպի մանրամասներն այժմ ճշտվում են և կհաղորդվեն՝ ստուգվելուց հետո։

Լրացում. ՀՀ ՊՆ մամուլի քարտուղար Արծրուն Հովհաննիսյանն իր ֆեյսբուքյան էջում հայտնել է, որ հունիսի 23-ին՝ ժամը 15։00-ի սահմաններում, Կարմիր խաչի երևանյան գրասենյակը դիմել է ՀՀ ՊՆ-ին՝ երաշխիքներ տրամադրելու համար, որպեսզի Տավուշի մարզի Վազաշեն գյուղի դիմաց գտնվող ադրբեջանական դիրքերի մերձակա հատվածից, դուրս բերվեն ականային հավանական վիրավորումներ ստացած ադրբեջանցի երկու զինծառայողների մարմինները: ՀՀ ՊՆ կողմից երաշխիքները տրամադրվել են անմիջապես։

Արծրուն Հովհաննիսյանը հայտնել է նաև, որ ադրբեջանական զինուժի որևէ ծառայող հայկական կողմ չի անցել։