Հունիսի 21-ին լրացավ ՀՀ ոստիկանության զորքերի կազմավորման 23-րդ տարին, ինչի կապակցությամբ այսօր՝ հունիսի 22-ին, սպառազինության և տեխնիկայի ցուցադրություն էր կազմակերպվել ոստիկանության զորքերի շտաբին հարակից տարածքում։ Հանդիսավոր միջոցառմանը ներկա են եղել ՀՀ պաշտպանության նախարար Սեյրան Օհանյանը, ՀՀ ոստիկանության պետ, գեներալ-լեյտենանտ Վլադիմիր Գասպարյանը, ՀՀ ոստիկանության զորքերի հրամանատար, գեներալ-լեյտենանտ Լևոն Երանոսյանը, պաշտպանության նախարարության և ոստիկանության բարձրաստիճան այլ ներկայացուցիչներ։
Այս մասին հայտնում են ՀՀ ՊՆ և ոստիկանության մամուլի ծառայությունները։
Հյուրերը ծանոթացել են ոստիկանության զորքերի կողմից հասարակական կարգի պահպանման նպատակով կիրառվող սպառազինությանն ու միջոցներին, դրանց տեխնիկական բնութագրերին:
Կարևոր է նշել, որ իր գլխավոր առաքելությունից՝ հասարակական կարգի պահպանումից բացի, ոստիկանության զորքերը մեծ ավանդ են ունեցել նաև Արցախյան ազատամարտում՝ իրենց ստորաբաժանումներով մասնակցելով ինքնապաշտպանական մարտերին և գործողություններին, երբ դեռ կազմավորված չէր հայկական բանակը։
Ողջունելով ներկաներին ոստիկանության զորքերի կազմավորման տարեդարձի կապակցությամբ, գեներալ-լեյտենանտ Վլադիմիր Գասպարյանը շնորհավորական խոսք է հղել ոստիկաններին և նրանց ընտանիքների անդամներին, մաղթել նորանոր ծառայողական հաջողություններ և մասնագիտական ձեռքբերումներ։
Տոնի կապակցությամբ տեղի է ունեցել նաև պարգևատրման արարողություն: Ոստիկանության զորքերի մի շարք զինծառայողներ ՀՀ պաշտպանության նախարարի և ՀՀ ոստիկանության պետի կողմից պարգևատրվել են գերատեսչական մեդալներով։
Ոստիկանության զորքերի կազմավորման տարեդարձին նվիրված միջոցառումը եզրափակվել է ցուցադրական ելույթներով, որոնց ընթացքում ոստիկանության պատվո պահակախմբի և հատուկ նշանակության ստորաբաժանումների զինծառայողները ցուցադրել են իրենց մասնագիտական հմտությունները։