ԱՄՆ Պետդեպի զեկույցում Վրաստանը որպես տարանցիկ երկիր է նշվում ահաբեկիչների համար

Հունիսի 20-ին ԱՄՆ Պետդեպարտամենտը հրապարակել է իր՝ 2014թ տարեկան զեկույցն ահաբեկչության մասին, որտեղ նշվում է, թե ԱՄՆ-ն անհանգստացած է, որ Վրաստանը դեռևս միջազգային ահաբեկչական կենտրոն է, ինչպես նաև տարանցիկ երկիր ծայրահեղականների համար։

«Իսլամական պետություն» ահաբեկչական խմբավորման հրամանատարներից Թարխան Բատիրաշվիլին

ԱՄՆ Պետդեպը, հղում անելով լրատվամիջոցներին, նշում է, որ 2014թ. դեկտեմբերից Սիրիայում և Իրաքում «ալ-Քաիդայի» և «Իսլամական պետության» շարքերում կռվում է 50-100 վրաստանցի, հիմնականում մահմեդականներով բնակեցված Աջարիայից և Պանկիսի կիրճից։

Զեկույցում ներկայացվում է նաև, որ հաշվի առնելով Վրաստանի աշխարհագրական դիրքը և օգտագործելով երկրի տարածքը՝ իսլամիստ ծայրահեղականները շարունակում են Ռուսաստանի Հյուսիսային Կովկասի շրջանից անցնել Սիրիա և Իրաք։

Մյուս հարցը, որի շուրջ Պետդեպն անդրադարձել է Վրաստանին, սահմանների անվտանգությունն է։ Այս մասին մասնավորապես նշվում է. «Վրաստանը շարունակում է իր սահմանների անվտանգության ապահովման գործընթացը՝ Եվրամիության հետ առանց վիզայի ռեժիմ ստանալու համար։  Սակայն, չվերահսկելով Ռուսաստանի կողմից օկուպացրած Աբխազիան և Հարավային Օսիան, այս երկիրը չի կարողանում ամբողջությամբ իրականացնել իր հյուսիսային սահմանների հսկողությունը»։

Հիշեցնենք, որ սիրիական հակամարտության ընթացքում արդեն մահացել է 12 վրաստանցի, որոնցից 11-ը եղել են Պանկիսիի կիրճից (Ախմետի շրջան), 1-ը՝ Աջարիայից։

Սիրիայում կռվող ամենահայտնի վրաստանցին (նույնպես Պանկիսիի կիրճից) Թարխան Բատիրաշվիլին է, նույն ինքը՝ Ումար ալ Շիշանին (Շիշանին արաբերեն Չեչնիան է)։ Բատիրաշվիլին Սիրիայում «Իսլամական պետության» խմբավորման հայտնի հրամանատարներից է։ Դեռ 2014-ին ԱՄՆ-ն Բատիրաշվիլուն ներառել է ԻՊ-ի հետ կապ ունեցող ամենավտանգավոր 11 ահաբեկիչների ցանկում, իսկ նրա մասին տեղեկության դիմաց պատրաստ է վճարել 5 մլն ԱՄՆ դոլար։