2015-ին ՌԴ ԶՈւ միջուկային ուժերի զինանոցը կհամալրվի 40 նոր միջմայրցամաքային բալիստիկ հրթիռներով։ Այս մասին այսօր՝ հունիսի 16-ին, Ռուսաստանում անցկացվող «Բանակ-2015» ֆորումի ժամանակ հայտարարել է ՌԴ նախագահ Վլադիմիր Պուտինը։
Ռուսաստանյան ՌՍ-26 «Ռուբեժ» միջմայրցամաքային բալիստիկ հրթիռ
Ռուսաստանյան «ՌԻԱ Նովոստի» գործակալության փոխանցմամբ՝ նախագահ Պուտինը հայտարարել է, որ նոր հրթիռները կկարողանան հաղթահարել տեխնիկապես կատարելագործված հակահրթիռային պաշտպանության ցանկացած համակարգ։
Նշենք, որ խոսքը ՌՍ-26 «Ռուբեժ» միջմայրցամաքային բալիստիկ հրթիռների մասին է։
ՌԴ Զու Ռազմավարական նշանակության հրթիռային զորքերի (Ракетные войска стратегического назначения ” РВСН) հրամանատար, գեներալ-գնդապետ Սերգեյ Կարակաևը հայտնել է, որ ՌՍ-26 «Ռուբեժ» միջմայրցամաքային բալիստիկ նոր հրթիռների փորձարկումներն արդեն ավարտվել են և մինչև ընթացիկ տարվա վերջ կընդունվի որոշում դրանք մարտական հերթապահությունում ընդգրկելու վերաբերյալ։
Նշենք, որ ՌՍ-26 «Ռուբեժ» միջմայրցամաքային բալիստիկ հրթիռների թռիչքի առավելագույն հեռավորությունը 11 հազար կմ է, այն կարող է համալրվել ընդհանուր առմամբ 150-ից 300 կիլոտոննա հզորությամբ 4 մարտագլխիկով։