Հունգարիայի արևելքում հունիսի 11-ին վարժանքի ժամանակ տեխնիկական անսարքության պատճառով վթարվել է Հունգարիայի ՌՕՈւ JAS 39 Gripen ևս մեկ կործանիչ: Օդաչուն փորձել է վայրէջք կատարել, սակայն կործանիչը վերահսկողությունից դուրս է եկել ու ընկել: Օդաչուին վնասվածքներով տեղափոխել են հիվանդանոց: Վերջինիս վիճակը գնահատվում է կայուն: Այս մասին հայտնում է հունգարական պետական MTI լրատվական գործակալությունը:
Շվեդական արտադրության Saab JAS 39 Gripen բազմանպատակային կործանիչ
Գործակալությունը նաև հայտնում է, որ Հունգարիայի ԶՈւ ԳՇ պետի տեղակալը դեպքից հետո հայտարարել է, որ իրենք պատրաստվում են ստուգել իրենց բոլոր JAS 39 Gripen կործանիչները՝ հետագայում նման միջադեպերը կանխելու համար: Պաշտոնյան միևնույն ժամանակ հավելել է, որ հունիսի 11-ի դեպքը որևէ կապ չունի Չեխիայում մի քանի շաբաթ առաջ զորավաժության ժամանակ գրանցված վթարի միջադեպի հետ:
Հիշեցնենք, որ մայիսի 19-ին Lion Effort 2015 միջազգային ռազմաօդային զորավարժության ժամանակ թռիչքի ընթացքում չեխական Չասլավ քաղաքի մոտ դեռևս չպարզված պատճառներով վթարվել էր Հունգարիայի ՌՕՈւ-ի՝ շվեդական Saab ընկերության JAS 39 Gripen բազմանպատակային ևս մեկ կործանիչ, որի երկու օդաչուներին հաջողվել էր ժամանակին կատապուլտով դուրս թռչել և փրկվել:
Saab JAS 39 Gripen-ը թեթև, միաշարժիչ, բազմանպատակային կործանիչ է, արտադրվում է շվեդական Saab ավիաընկերության կողմից: Նախատեսված է եղել Շվեդիայի ՌՕՈւ-ի համար: Շվեդիայի ՌՕՈւ-ում կիրառության մեջ է 1997-ից:
Զանգվածը – 6622 կգ
երկարությունը – 14 մ
Թռիչքի հեռավորությունը – 3250 կմ
Առաջին թռիչքը – 1988 դեկտեմբերի 9-ին
Արժողությունը – 40–60 մլն ԱՄՆ դոլար