Այսօր՝ հունիսի 9-ին, Վրաստանում մեկնարկել է ՆԱՏՕ-ի «Ռազմավարական ռազմական գործընկերություն համաժողովը» (Strategic Military Partner Conference)։ Համաժողովին մասնակցում է նաև Հայաստանի ԶՈւ պատվիրակությունը՝ ԳՇ պետ, գեներալ-գնդապետ Յուրի Խաչատուրովի գլխավորությամբ։
Երկօրյա համաժողովի ավարտից հետո, ըստ ՀՀ ՊՆ տեղեկատվության վարչության հաղորդագրության, Յուրի Խաչատուրովի գլխավորած պատվիրակությունը պաշտոնական այցի շրջանակներում հանդիպումներ կանցկացնի Վրաստանում։
Մինչ այդ, Թբիլիսիում անցկացվող համաժողովի բացումն արել է Վրաստանի պաշտպանության նախարար Թինաթին Խիդաշելին։ Վերջինս խոսել է անվտանգության ոլորտում առաջնահերթությունների, ինչպես նաև Վրաստանի՝ ՆԱՏՕ-ին անդամակցելու կարևորության մասին, հաղորդում է Վրաստանի ՊՆ մամուլի ծառայությունը։
Նախարար Խիդաշելին ևս մեկ անգամ հույս է հայտնել, որ ՆԱՏՕ-ի Վարշավայում 2016թ. անցկացվելիք գագաթաժողովի ժամանակ Վրաստանը կստանա ցանկալի արդյունք (նկատի ունի ՆԱՏՕ-ին անդամակցությունը—Ռազմինֆո) և որ «Դաշինքի անդամ երկրները իրենց խոսքի տերը կլինեն»։
Համաժողովին մասնակցում են ՆԱՏՕ-ի անդամ երկրների զինված ուժերի ներկայացուցիչներ, ինչպես նաև ՆԱՏՕ-ի գործընկեր երկրներից փորձագետներ և բարձրաստիճան զինվորականներ։
Միջոցառման ընթացքում ներկաներին տեսակապի միջոցով ողջունել է ՆԱՏՕ-ի գգլխավոր քարտուղարի տեղակալ Ալեքսանդր Վերշբոուն։ Ելույթ են ունեցել նաև ՆԱՏՕ-ի միացյալ զինված ուժերի գերագույն հրամանատար, Ֆրանսիայի ռազմաօդային ուժերի գեներալ Ժան-Պոլ Պալոմերոսը, ՆԱՏՕ-ի ցամաքային ուժերի հրամանատարի տեղակալ, գեներալ-լեյտենանտ Էդվարդ Դեյվիսը։
Համաժողովը կազմակերպել են ՆԱՏՕ-ի միացյալ զինված ուժերի տրանսֆորմացիոն հարցերով հրամանատարությունը (Allied Command Transformation NATO) և Վրաստանի զինված ուժերը։
Նույն օրը Վրաստանի նախագահական նստավայրում (Թբիլիսի) ՆԱՏՕ-ի անդամ պետությունների բարձրաստիճան անձանց և փորձագետներին ընդունել է երկրի նախագահ Գեորգի Մարգվելաշվիլին։