Մահվան ելքով միջադեպ՝ Ադրբեջանի ԱԻՆ զորամասերից մեկում

Մայիսի 22-ի երեկոյան Ադրբեջանի արտակարգ իրավիճակների նախարարության՝ Բաքվում տեղակայված զորամասերից մեկում գրանցվել է միջադեպ, որի հետևանքով մահացել է ժամկետային զինծառայող, 1992-ին ծնված Բաբաշով Թափդըգ Ալիզաման օղլուն (Babaşov Tapdıq Əlizaman oğlu)։ Ըստ նախնական վարկածի՝ զինծառայողը մահացել է՝ ընկնելով 4-րդ հարկից։ Այս մասին հայտնում են ադրբեջանական լրատվամիջոցները՝ հղում անելով մահացածի հարազատներից մեկի ֆեյսբուքյան գրառմանը։

Բաբաշով Թափդըգ Ալիզաման օղլուն

Մահացած զինծառայողի ազգականն իր գրառման մեջ նշել է, որ թեպետ ասվում է, թե մահվան պատճառը 4-րդ հարկից ընկնելն է, այդուհանդերձ, մահացածի ձեռքերին եղել են հետքեր, որոնք, ազգականի կարծիքով, առաջացել են պարանով կապված լինելու հետևանքով։ Հայտնի է նաև, որ Բաբաշովը չի մահացել տեղում. ընկնելուց հետո նրան տեղափոխել են հոսպիտալ, որտեղ էլ զինծառայողը, չկարողանալով դուրս գալ կոմայից, մահացել է։

Նույն աղբյուրը նշում է նաև, որ Բաբաշով Թափդըգը ժամկետային զինծառայության էր զորակոչվել երկու ամիս առաջ։

Հավելենք, որ 2015-ի մայիսին սա Ադրբեջանի պաշտպանական և ուժային համակարգի կառույցներում մահվան ելքով 3-րդ միջադեպն է, որի մասին հայտնի է դառնում։