ՀԱՊԿ ուժերը չեզոքացրել են «Տաջիկստան ներխուժած զինյալներին» և ավարտել զորավարժությունը

Այսօր՝ մայիսի 19-ին, ՀԱՊԿ արագ արձագանքման հավաքական ուժերն անցկացրել են հանկարծակի ստուգումով սկսված զորավարժության ակտիվ փուլը, որի ընթացքում ոչնչացրել են զորավարժության սցենարով «Աֆղանստանից Տաջիկստան ներխուժած» պայմանական զինված խմբավորումը: Այս մասին տեղեկացնում է ՀԱՊԿ պաշտոնական կայքը:

Հայաստանյան զորախմբի մարտիկը՝ «ՌՊԿ» ձեռքի գնդացիրով պայմանական թիրախները խոցելիս

Զորավարժության սցենարով՝ ապօրինի զինված խմբավորումները «Աֆղանստանից ներխուժում են Տաջիկստանի տարածք»: Երկրի զինված ուժերը բացազատվում են զինված խմբավորումների դեմ պայքարելու համար:

Միևնույն ժամանակ սցենարով ՀԱՊԿ Հավաքական անվտանգության խորհուրդը (խորհրդի կազմում կազմակերպության անդամ երկրների նախագահներն են և ՀԱՊԿ գլխավոր քարտուղարը) որոշում է երկրում իրավիճակի կայունացման նպատակով այնտեղ բացազատել ՀԱՊԿ արագ արձագանքման հավաքական ուժերը:

Մայիսի 12-ին ուժերի՝ բարձր պատրաստության աստիճանի բերմամբ սկսվում է զորավարժությունը: Այնուհետ մայիսի 13-15-ին զորավարժության մասնակից ստորաբաժանումները՝ ընդհանուր մոտ 2500 զինծառայող, տեղափոխվում են Տաջիկստանի «Խարբմայդոն» զորավարժարան, որտեղ էլ մայիսի 16-ից 18-ը վերախմբավորվում և պատրաստվում է բուն գործողությանը:

Զորավարժության ակտիվ փուլի սկզբում Տաջիկստանի ԶՈւ ինքնաթիռները հետախուզում են տարածքը և հայտնաբերում «հակառակորդի 700 հոգանոց խումբ»:

Արդեն տեղում հետախուզական աշխատանքները կատարում է զորավարժությանը մասնակցող հայկական ստորաբաժանումը, որը հայտնաբերում է հակառակորդի ուժերի պարագլխին ու մարտի մեջ մտնում զինյալների խմբի դեմ:

Հետախույզներից ազդանշան ստանալով՝ արագ արձագանքման ուժերի հրամանատարը Ռուսաստանի, Բելառուսի, Ղրղզստանի ու Տաջիկստանի ուժերին հրահանգում է մեկնել գործողությունների շրջան՝ հակառակորդի խմբին ձերբակալելու և հայկական ստորաբաժանման նահանջն ապահովելու: Միաժամանակ Բելառուսի ու Տաջիկստանի օդադեսանտային ուժերը ուղարկվում են զինյալների պարագլխին տեղափոխելու համար:

Հայաստանյան զորախմբի մարտիկը ուսումնավարժության ժամանակ

ՀԱՊԿ արագ արձագանքման հավաքական ուժերի վարժանքները Տաջիկստանի «Խարբմայդոն» զորավարժարանում

Զորավարժության հաջորդ փուլով արագ արձագանքման ուժերի ավիացիան և հրետանին հայտնաբերում ու հարվածներ է հասցնում թշնամու հիմնական ուժերին, որպեսզի դրանք չկարողանան օգնության հասնել արդեն մարտի մեջ մտած փոքր խմբին:

Հակառակորդի՝ մարտի մեջ մտած փոքր ուժերը սկսում են շարժվել դեպի Աֆղանստանի սահման, սակայն նրանց շարժումը կասեցնելու համար իջեցված դեսանտը փակում է ճանապարհը և բոլոր կրակային միջոցներով չեզոքացնում պայմանական հակառակորդին:

ՀԱՊԿ գլխավոր քարտուղար Նիկոլայ Բորդյուժան, ով հետևում էր զորավարժությանը, նշել է, որ հավանական է համարվում Աֆղանստանից «Թալիբան» և «Իսլամական պետություն» զինյալ ահաբեկչական խմբավորումների ներխուժումը Տաջիկստանի տարածք, և հենց այս պատճառով է, որ զորավարժությունը կազմակերպվել է այդ երկրի տարածքում: