Ներկայիս Թուրքիայի կենտրոնական Կայսերի (Կեսարիա) նահանգում մայիսի 20-22-ը Թուրքիայի ԶՈւ ցամաքային զորքերի օդային դեսանտի ստորաբաժանումների մասնակցությամբ անցկացվելու է «Էրջիյես-2015» գումարտակային զորավարժություն։ Այս մասին հայտնում է Թուրքիայի ԶՈւ գլխավոր շտաբի կայքը։
Զորավարժությունը անցկացվելու է Թուրքիայի ԶՈւ ցամաքային զորքերի կոմանդոսների 1-ին բրիգադի կոորդինացմամբ, որը տեղեկայված է Կեսարիայում։
Զորավարժություններին մասնակցելու է կոմանդոսների 1-ին բրիգադի հրամանատարության օդադեսանտային 1 գումարտակ, հրետանային գումարտակ և օժանդակ ուժեր, ինչպես նաև Թուրքիայի ԶՈւ ռազմաօդային ուժերի 2 միավոր F-16 կործանիչ, 11-րդ ավիաէսկադրիլիայի 2 միավոր Casa CN-235 բեռնատար ինքնաթիռ, 12-րդ ավիաէսկադրիլիայի 8 միավոր C-130 Hercules, C-160 Transall բեռնատար ինքնաթիռներ, ցամաքային զորքերի ավիացիայի հրամանատարության 4 միավոր Sikorski UH-60 բազմանպատակային ուղղաթիռ, 2 միավոր AH-1W Super Cobra և 1 միավոր T-129 Atak հարվածային ուղղաթիռներ:
Զորավարժության նպատակն է փորձարկել Թուրքիայի ԶՈւ համապատասխան ստորաբաժանումների օդադեսանտային գործողությունների արդյունավետությունը, զարգացնել միավորումների միջև համագործակցությունը համատեղ գործողությունների ընթացքում, բարձրացնել ղեկավար կազմի մարտական կարողությունները, իրական պայմաններում փորձարկել Թուրքիայի ԶՈւ 300 զինված պարաշյուտիստների մարտական ընդունակությունները։