Մայիսի 5-ից 8-ը Թուրքիայում անցկացվող IDEF-2015 ռազմարդյունաբերական ցուցահանդեսի շրջանակներում թուրքական FNSS ռազմարդյունաբերական ընկերությունը ներկայացրել է նոր զրահատեխնիկաներ՝ այդ թվում Kaplan-20 ՀՄՄ-ն և IFV25 8×8 մարտավարական անվավոր զրահամեքենան։ Հայտնում է թուրքական «Հաբերլեր» լրատվակայքը։
FNSS ընկերության նախագծած Kaplan-20 զրահամեքենան
IDEF-2015 ցուցահանդեսի առաջին օրը FNSS ընկերությունը ներկայացրել է Kaplan-20 թրթուրավոր զրահամեքենան, IFV25 8×8 մարտավարական անվավոր զրահամեքենան, Pars 4×4 անվավոր զրահամեքենայի նոր տարբերակը, ինչպես նաև PARS 6×6 KBRN հետախուզական մեքենան ։
FNSS-ի «Մալայզիական ծրագրի» տնօրեն Ջեյհուն Սյուերը հայտարարել է, որ AV-8 IFV25 8×8 զրահամեքենան ստորագրված պայմանագրի համաձայն համալրելու է Մալայզիայի ցամաքային զորքերի սպառազինությունը։ Նա հիշեցրել է, որ դեռևս 2011-ին ընկերությունն այդ երկրի հետ 257 զրահամեքենայի առաքման՝ 559 մլն դոլարի պայմանագիր է կնքել, սակայն մինչ այժմ առաքվել է ընդամենը 17-ը։ Ընկերության ներկայացուցիչը հույս է հայտնել, որ մինչև 2018 թվականը զրահամեքենաներն կառաքվեն ամբողջությամբ։
IFV25 8×8 մարտավարական զրահամեքենայի մարտավարատեխնիկական բնութագրերն են. ցամաքային առավելագույն արագությունը՝ 100կմ/ժ, առավելագույն ջրային արագությունը՝ 7 կմ/ժ, անձնակազմը – 3+7 մարդ (մեխանիկ-վարորդ, հրամանատար, նշանառու և 7 դեսանտային)։
Սպառազինությունը. մոդուլային աշտարակի վրա տեղադրված 25 մմ տրամաչափի M242 ավտոմատացված հրանոթ, նշանառության ջերմային տեսանելիության համակարգ։
AV-8 IFV25 8×8 զրահամեքենան IDEF-2015 ռազմարդյունաբերական ցուցահանդեսում
Kaplan-20 զրահամեքենան համալրված է ամֆիբիա համակարգերով, որի շնորհիվ առանց առանձնահատուկ նախապատրաստման կարող է անցնել ջրային տարածություններով։ Զրահամեքենայի տրանսմիսիան ավտոմատացված է։
Անձնակազմը՝ 3+6, կամ 3+8 (նշանառու, վարորդ, հրամանատար), լայնությունը՝ 3,15 մետր, առավելագույն արագությունը՝ 70կմ/ժ, գլխավոր զինատեսակը՝ 30մմ ավտոմատացված հրանոթ։ Օժտված է նաև 7.62 մմ գնդացիրով, գիշերային և ցերեկային տեսանելիության սարքերով, լազերային հեռաչափով։
Kaplan-20 թրթուռավոր զրահամեքենան IDEF-2015 ցուցահանդեսում
Kaplan-20 զրահամեքենայի ներսը
PARS 4X4 նոր մարտավարական անվավոր զրահամեքենան նախատեսված է հակատանկային և հրամանատարաշտաբային գործողությունների համար։ Զրահամեքենայի անձնակազմը 5 մարդ է, այն կարող է շարժվել և խուսանավել ջրում։ Ցամաքային արագությունը 120կմ/ժ է, առավելագույն հեռավորությունը՝ 700կմ, ջրային առավելագույն արագությունը՝ 8կմ/ժ։
FNSS ընկերության PARS 4X4 զրահամեքենան IDEF-2015 ցուցահանդեսում
FNSS ընկերության PARS 4X4 զրահամեքենայի կառուցվածքը
FNSS ընկերության PARS 4X4 զրահամեքենան
Նշենք, որ FNSS ընկերությունը թուրքական Nurol հոլդինգի և բրիտանական British Aerospace (BAe) ընկերության համատեղ ձեռնարկությունն է, սակայն բաժնետոմսերի մեծամասնությունը պատկանում է թուրքական կողմին։
Ընկերությունը հիմնադրվել է 1987-ին՝ թուրքական Nurol և ամերիկյան FMC (Food Machinery Corporation) ռազմարդյունաբերական ընկերությունների միջև կնքված պայամանագրով և այդ վերջիններիս անուններից ստացել FNSS (FMC-Nurol Savunma Sanayi) անվանումը։ FNSS-ը 1989-ից թրթուրավոր և անվավոր զրահամեքենաներ է արտադրում Թուրքիայի զինված ուժերի համար։ Ընկերության արտադրանքը արտահանվում է նաև արտասահմանյան մի շարք պետություններ։