Թուրքական «Ասելսան» ընկերությունը կներկայացնի սեփական արտադրության հակատորպեդային համակարգը

2015թ մայիսի 5-8-ը Ստամբուլում անցկացվելիք 12-րդ միջազգային ռազմարդյունաբերական IDEF-2015 ցուցահանդեսում թուրքական «Ասելսան» ռազմաարդյունաբերական ընկերությունը ներկայացնելու  է ռազմական նշանակության նոր արտադրատեսակներ։ Այս մասին հայտնում է թուրքական «Անադոլու» լրատվական գործակալությունը։

«Ասելսան» ռազմարդյունաբերական ընկերության TORK հակատորպեդային պաշտպանության «հրթիռը»

«Ասելսան» ռազմարդյունաբերական ընկերության TORK հակատորպեդային պաշտպանության «հրթիռը»

Նշվում է, որ թուրքական խոշորագույն ռազմարդյունաբերական «Ասելսան» ընկերությունը այս տարի ցուցահանդեսին առաջին անգամ ներկայացնելու է  հակատորպեդային և հակատանկային պաշտպանության նոր միջոցներ։ Ցուցահանդեսի ասելսանյան նորույթներից են լինելու նաև փոքր հեռահարության հակաօդային պաշտպանության զենիթահրթիռային HISAR-A համակարգը, էլեկտրաօպտիկական համակարգեր, անվտանգության և կապի համակարգեր։

Զենիթահրթիռային սեփական համակարգի մշակումը Թուրքիան սկսել է 2011 թվականին Թուրքիայի ռազմարդյունաբերական քարտուղարության ղեկավարած «Ցածր հեռահարության հակաօդային պաշտպանության հրթիռային համակարգ» (HISAR-A) նախագծի շրջանակներում։ Համակարգը նախատեսվում է շահագործման հանձնել 2018 թվականին։

Ծրագիրն իրականացնում է  «Ասելսան» ընկերությունը: Աշխատանքներին մասնակցում է մեկ այլ խոշոր թուրքական ռազմարդյունաբերական ընկերություն՝ «Ռոքեթսանը» (Roketsan), որն էլ զբաղվում է հրթիռների արտադրությամբ։

Հավելենք, որ Թուրքիայի խոշորագույն ռազմարդյունաբերական «Ասելսան» ընկերությունն  իր արտադրանքներն արտահանում է աշխարհի 48 երկրներ՝ այդ թվում Ադրբեջան, Ղազախստան, Պակիստան և Հորդանան։

Ավելացնենք նաև, որ «Ասելսանը» մասնագիտացած է ռազմական նշանակության էլեկտրոնային սարքավորումների արտադրության մեջ։ Ընկերության մասին առավել մանրամասն կարող եք կարդալ Ռազմական հանրագիտարանի «Ասելսան» հոդվածում:

One response to “Թուրքական «Ասելսան» ընկերությունը կներկայացնի սեփական արտադրության հակատորպեդային համակարգը

  1. Pingback: IDEF-2015-ում ՌԴ-ի ու Թուրքիայի համար առաջնային է ՀՕՊ համակարգերի թեման | Ռազմ.info

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *