Մայիսի 11-25-ը Վրաստանն ու ԱՄՆ-ն համատեղ զորավարժություն են անցկացնելու Թբիլիսիի մերձակայքում գտնվող Վազիանի զորավարժարանում: ՆԱՏՕ-ի արագ արձագանքման ուժերի «Ազնիվ գործընկեր» (Noble partner) անունը կրող վարժանքների նպատակն է զարգացնել փոխգործակցությունը մասնակիցների միջև։ Այս մասին ապրիլի 22-ին հայտնել է Վրաստանում ամերիկյան դեսպանատունը։
Դեսպանատան տվյալներով վարժանքներին մասնակցելու համար Վրաստան են ժամանելու ամերիկացի 200 զինծառայող։ Նախապես հայտարարվել էր, որ ամերիկյան կողմից զորավարժությանը մասնակցելու են «Բրեդլի» զրահափոխադրիչների վաշտը և ԱՄՆ բանակի դեսանտայինների 1 վաշտ։ Ըստ ամենայնի, զինծառայողները վերոնշյալ ստորաբաժանումներից են։
Վրաստանյան կողմից մասնակցելու են զինված ուժերի 1-ին հետևակային բրիգադի 12-րդ գումարտակի «Ալֆա» վաշտը, 4-րդ մեխանիզացված բրիգադի 42-րդ գումարտակի 1-ին մեխանիզացված վաշտը, ինչպես նաև ռազմական ոստիկանության մի դասակ։
ՆԱՏՕ-ի արագ արձագանքման ուժերը ձևավորվել են 2002 թվականին։ Դեռևս 2013թ. այն ժամանակ Վրաստանի պաշտպանության նախարար Իրակլի Ալասանիան հայտարարել էր, որ Վրաստանը դիմել է ՆԱՏՕ-ին արագ արձագանքման ուժերի անդամ դառնալու համար։ Քննարկվում էր, որ Վրաստանը կարող է վերջինիս անդամակցել 2015 թվականից։
Հարկ է նշել նաև, որ ընթացիկ տարվա մարտի վերջին էլ Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ապատուրայը հայտարարել է, որ ամռանը ՆԱՏՕ-ն Վրաստանի հետ համատեղ զորավարժություն կանցկացնի։
Հավելենք, որ 2008-ին Բուխարեստում անցկացված՝ ՆԱՏՕ-ի գագաթաժողովում սկսվեց Վրաստանին անդամակցության պատրաստելու գործընթացը: 2014-ի սեպտեմբերի 4–5 Ուելսում ՆԱՏՕ գագաթաժողովի ժամանակ Վրաստանին առաջարկվեց համագործակցության նոր փաթեթ։ Այն ենթադրում է Վրաստանում համատեղ ռազմաուսումնական և լոգիստիկ կենտրոնների հիմնում։
Այժմ Վրաստանն ակտիվորեն փոփոխություններ է անում պաշտպանական համակարգում՝ ՆԱՏՕ-ի չափանիշներին համապատասխանելու և Ուելսում համագործակցության նոր փաթեթի պահանջներն իրականացնելու համար։ Այս տարի Դաշինքի մասնագետները մի քանի անգամ արդեն այցելել են Վրաստան և ուսումնասիրել են ՆԱՏՕ-ի հետ համատեղ ուսումնական կենտրոնի ստեղծման հնարավոր վայրերը։ Այս պահին ուսումնական կենտրոնի հավանական «թեկնածուներից» են Վազիանի ռազմաբազայի տարածքն ու ազգային ուսումնական «Կրցանիսի» կենտրոնը։