Ադրբեջանի պաշտպանության նախարար, գեներալ-գնդապետ Զաքիր Հասանովն ապրիլի 23-ին ընդունել է պաշտոնական այցով երկիր ժամանած Թուրքիայի ԶՈւ բժշկական ծառայության և Գյուլհանեի ռազմաբժշկական ակադեմիայի պետ, կորպուսի գեներալ Օմար Փաչինի գլխավորած պատվիրակությունը: Այս մասին հայտնում է Ադրբեջանի ՊՆ մամուլի ծառայությունը։
Զաքիր Հասանովն ու Օմար Պաչինը Ադրբեջանի բժշկական համալսարանի ռազմական բժշկության ֆակուլտետի մոդելավորման կենտրոնում
Կողմերը ծանոթացել են Ադրբեջանի բժշկական համալսարանի ռազմաբժշկության ֆակուլտետի մոդելավորման կենտրոնի աշխատանքներին, ինչպես նաև եղել ուսանողական լաբորատորիայում, գրադարանում և ուսանողական հանրակացարանում:
Շրջայցից հետո Ադրբեջանի պաշտպանության նախարարը հանդիպում է ունեցել նաև թուրքական պատվիրակության մյուս անդամների հետ: Հասանովը բարձր է գնահատել այս և մյուս ոլորտներում Թուրքիայի աջակցությունն Ադրբեջանին:
Նշենք, որ ռազմաբժշկության ոլորտում թուրք-ադրբեջանական համագործակցության վառ օրինակներից է 2014-ի օգոստոսի սկզբին հայկական կողմի պատժիչ գործողության արդյունքում ծանր վիրավորված ադրբեջանցի զինծառայողների՝ Թուրքիայում ստացած բուժօգնությունը, որի ծախսերը հոգացել է Թուրքիայի ԱԳՆ-ին ենթակա Թուրքական համագործակցության ու համակարգման գործակալությունը (TIKA):
Հիշեցնենք, որ վերջին շրջանում բավական հաճախ է դարձել թուրք բարձրաստիճան զինվորականների այցն Ադրբեջան. 2014-ի նոյեմբերին Ադրբեջան էր ժամանել նաև Թուրքիայի հատուկ նշանակության ուժերի հրամանատար, գեներալ-լեյտենանտ Զեքայի Աքսաքալլըն և թուրքական ժանդարմերիայի գլխավոր հրամանատարության պետ, բանակի գեներալ Աբդուլլահ Աթայը, իսկ այս տարի՝ Ադրբեջան են ժամանել նաև Թուրքիայի ԶՈւ գլխավոր շտաբի քարտեզագրության գլխավոր վարչության պետ, գեներալ-լեյտենանտ Բուրհանեթթին Աքթըն, ՌՕՈւ հրամանատար, բանակի գեներալ Աքըն Օզթյուրքը և ԶՈւ գլխավոր շտաբի հետախուզության պետ, կորպուսի գեներալ Մեհմեթ Դայսալան։