ՆԱՏՕ-ի զորավարժությանը մասնակցելը չի խանգարում ՀԱՊԿ անդամակցությանը. Սերժ Սարգսյան

Ապրիլի 22-ին՝ Ծիծեռնակաբերդի հուշահամալիրում պատասխանելով միջազգային լրատվամիջոցների հարցերին՝ ՀՀ նախագահ Սերժ Սարգսյանը նշել է, որ ՆԱՏՕ-ի կազմակերպած «Սուսերի միակցում» զորավարժությանը ՀՀ ԶՈւ խաղաղապահների մասնակցությունը չի խանգարում Հայաստանի՝ ՀԱՊԿ-ին անդամակցելուն:

ՀՀ ԶՈւ խաղաղապահների զորախումբը Գերմանիա մեկնելու հանդիսավոր արարողության ժամանակ

Russia Today հեռուստաընկերության լրագրողի հարցին պատասխանելով՝ նախագահ Սարգսյանը նշել է, որ զորավարժությանը մասնակցելը բացարձակապես որևէ խնդիր չի ստեղծում գործընկերների հետ հարաբերություններում: Նախագահի խոսքով՝ Հայաստանին բավարար չէ միայն անվտանգության սպառող լինելը, և հայկական կողմը փոքր կազմով, բայց նույնպես ցանկանում է մասնակից լինել աշխարհում կայունության և խաղաղության հաստատմանը:

«ՆԱՏՕ-ի հետ մենք շարունակելու ենք մեր համագործակցությունը, որը երկար տարիների պատմություն ունի, և մեզ համար դա օգտակար համագործակցություն է: Բնավ, չի խանգարում մեր` ՀԱՊԿ անդամ լինելը»,— ասել է ՀՀ նախագահը:

Միջազգային լրատվամիջոցների հետ նախագահի ասուլիսի սղագրությունը կարող եք կարդալ Panorama.am կայքում:

Ավելացնենք, որ Կոսովոյի ուժերի մարտական պատրաստության ծրագրի շրջանակում ՆԱՏՕ անդամ և գործընկեր պետությունների «Սուսերի միակցում 2015» (Saber Junction) զորավարժությանը մասնակցելու համար Հայաստանի զինված ուժերի խաղաղապահ բրիգադի՝ 36 հոգուց բաղկացած ստորաբաժանումը Գերմանիա է մեկնել ապրիլի 4-ին:

17 երկրի ավելի քան 5000 զինծառայողների մասնակցությամբ զորավարժության նպատակն է բարձրացել Կոսովոյի խաղաղապահ առաքելության գործընթացում ներգրավված երկրների խաղաղապահ ստորաբաժանումների փոխգործակցության մակարդակը։