Իրանի պաշտպանության նախարարի ադրբեջանյան այցի առաջին օրվա ամփոփում

Այսօր՝ ապրիլի 20-ին, Իրանի պաշտպանության և զինված ուժերի աջակցման նախարար, բրիգադի գեներալ Հոսեյն Դեհղանը երկօրյա պաշտոնական այցով ժամանել է Բաքու, որտեղ նրան արդեն իսկ ընդունել են երկրի նախագահ Իլամ Ալիևն ու պաշտպանական արդյունաբերության նախարար Յավեր Ջամալովը։

Իրանի ՊՆ Դեհղանի և Ադրբեջանի նախագահ Ալիևի հանդիպումը

Դատելով հրապարակված լուսանկարներից, Ալիևի հետ հանդիպմանը Իրանի պաշտպանական գերատեսչության ղեկավարից բացի եղել են նաև Ադրբեջանում Իրանի արտակարգ և լիազոր դեսպան Մոհսեն Փաք Այինը, դեսպանության ռազմական կցորդ, գնդապետ Ամիր Ֆարաջի Մոեզը և բարձրաստիճան այլ զինվորականներ։

Երկկողմ հարաբերությունների քննարկման ժամանակ Իրանի պաշտպանության նախարար Դեհղանը արել է ուշագրավ երկու հայտարարություն. նա նշել է, որ Թեհրանը շահագրգռված է զարգացնել համագործակցությունն ադրբեջանական կողմի հետ ռազմական ոլորտում և որպես դրա բաղկացուցիչ մաս պատրաստ է դիտարկել նաև զենքի մատակարարումը ադրբեջանական բանակին։

Ուշագրավ մյուս հայտարարությունը վերաբերում է Կասպից ծովի ավազանում տիրող մրցակցությանը, որն առկա է Իրանի և Ադրբեջանի միջև։ Նախարար Դեհղանն Ալիևի հետ զրույցի ժամանակ կարծիք է հայտնել, որ խնդիրները պետք է լուծվեն խաղաղ ճանապարհով և Կասպից ծովի շուրջ առկա տարաձայնությունները չպետք է հիմք դառնան սպառազինության մրցավազքի համար։

Նկատենք, սակայն, որ չնայած իրանցի նախարարի՝ սպառազինության մրցավազքից խուսափելու քաղաքավարի հայտարարությանը, Իրանի ռազմածովային ուժերն ունեն բացահայտ առավելություն Ադրբեջանի ՌԾՈւ-ի և սահմանապահ պետական ծառայության ռազմանավերի նկատմամբ։ Այս համատեքստում նշենք նաև, որ 2013-ի ամռանն Իրանը հայտարարեց՝ Կասպից ծովի ավազանում ռազմածովային ստորաբաժանումներ կունենա նաև իսլամական հեղափոխության պահապանների կորպուսը։

Նշենք, որ Կասպից ծովում Իրանի և Ադրբեջանի միջև վեճի առարկան հիմնականում Իրանի կողմից հայտնաբերված և ներկայումս շահագործվող «Սարդար Ջանգյալ» նավթահորն է, որի շահագործման իրավունքն Ադրբեջանը համարում է իրենը։

Հավելենք նաև, որ պաշտպանության և ԶՈւ աջակցման նախարար Հոսեյն Դեհղանն այսօր հյուրընկալվել է նաև Ադրբեջանի պաշտպանական արդյունաբերության նախարարությունում, որտեղ զրույց է ունեցել գերատեսչության ղեկավար Յավեր Ջամալովի հետ։

Կարդացեք նաև՝ Իրանի պաշտպանության նախարարի ադրբեջանյան այցի երկրորդ օրվա ամփոփում