Մոնթե Մելքոնյանի անվան ռազմամարզական վարժարանը հայտարարել է ընդունելություն

ՀՀ ՊՆ Մոնթե Մելքոնյանի անվան ռազմամարզական վարժարանը հայտարարել է 2015-2016 ուսումնական տարվա ընդունելություն։  Վարժարանի, ընդունելության կարգի և անհրաժեշտ փաստաթղթերի մասին ստորև:

Վարժարանի սաները Ռազմինֆոյի համար ցուցադրում են իրենց ունակությունները

Վարժարանը ռազմամարզական թեքումով հանրակրթական հաստատություն է, որն իրականացնում է ավագ դպրոցի (10-րդ, 11-րդ և 12-րդ դասարաններ) պետական հանրակրթական ծրագրեր: Առանձնակի ուշադրություն է դարձվում ֆիզիկական, լեռնային և նախնական զինվորական պատրաստությանը: 2014-2015 ուսումնական տարվանից օտար լեզուների շարքում դասավանդվում են նաև «Հունարեն» և «Իտալերեն»: Ռազմամարզական վարժարանում տարվում է արական սեռի պատանիների ուսուցում: Ուսուցման լեզուն հայերենն է: Ուսուցման ժամկետը երեք տարի է, որը բաշխվում է շարունակական երեք կուրսի վրա (1-ին կուրս՝ 10-րդ դասարան, 2-րդ կուրս՝ 11-րդ դասարան, 3-րդ կուրս՝ 12-րդ դասարան): Ուսուցումն անվճար է:

Մոնթե Մելքոնյանի անվան ռազմամարզական վարժարանի սանը «Պատանի հայրենասերներ» 12-րդ միջազգային մրցույթ-հավաքին

Ովքե՞ր կարող են դիմել

Ռազմամարզական վարժարան ընդունվելու համար կարող են դիմել հանրակրթական դպրոցի 9-րդ դասարանն ավարտած ՀՀ քաղաքացիները:
Ռազմամարզական վարժարան ընդունվել ցանկացող պատանիների ծնողները (նրանց փոխարինող անձինք) ընդունելության տարվա ապրիլի 7-ից մինչև հուլիսի 22-ը ռազմամարզական վարժարանի պետի անունով ներկայացնում են դիմում, որին կցվում է պատանու դիմումը վարժարանում սովորելու ցանկության մասին:

Առջևից՝ Գագիկ Մկրտչյանը, Սերգեյ Ղազարյանը և Ալեքսանդր Կարապետյանը

Ընդունելության համար ի՞նչ քննություններ է հանձնելու դիմորդը

2015-2016 ուստարվա ընդունելությունը կկատարվի հուլիսի 22-ից օգոստոսի 3-ը` հիմնական կրթության 9-րդ դասարանի ծրագրի ծավալով:
Քննությունները հանձնելուց առաջ թեկնածուներն անցնում են ամբողջական բժշկական հետազոտություն:

Ընդունելության քննությունները անցկացվում են մրցութային կարգով հետևյալ առարկաներից.

•  ֆիզիկական պատրաստություն` ձգումներ ձողափայտից, 100 մետր և 1000 մետր վազք,
•  հայոց լեզու` թելադրություն,
• մաթեմատիկա` գրավոր:

Մոնթե Մելքոնյանի անվան ռազմամարզական վարժարանի սաները

Որո՞նք են անհրաժեշտ փաստաթղթերը

1. Դիմում,
2. Բժշկական փաստաթղթեր
   ա) մեզի և արյան անալիզներն առանձին (կնքված), MRP անալիզ (կնքված)
   բ) սրտի ԷԿԳ (ժապավենը և պատասխանը (կնքված)
   գ) տեղեկանք հոգեբուժական և նարկոլոգիական դիսպանսերներից (կնքված)
   դ) սոնոգրաֆիա (կնքված)
   ե) ձև 63 և 26 (կնքված)
   զ) արյան կարգը,
3. Ինքնակենսագրություն (դիմորդի ձեռագրով)
4. Բնութագիր` հաստատված դասղեկի և դպրոցի տնօրենի ստորագրություններով (կնքված),
5. 9-ամյա կրթության վկայականը և պատճենը,
6. Ծննդյան վկայականը և պատճենը,
7.  Տեղեկանք բնակավայրից, որտեղ նշված լինեն հասցեն և ընտանիքի կազմը,
8. Տեղեկանք ծնողների աշխատանքի վայրից, ծնողների (խնամակալի) անձնագրերի պատճենները,
9.  Սոցիալական քարտի պատճենը,
10. 3×4 չափսի 4 լուսանկար (առանց գլխարկի),
11.  Թղթապանակ և ծրար,
12. Դիպլոմների և պատվոգրերի պատճեններ, տեղեկանքներ, այլ փաստաթղթեր ծնողի և երեխայի կարգավիճակի մասին (ծնողազուրկ, հաշմանդամ, սոցիալապես անապահով, պատերազմի մասնակից):

Որտե՞ղ ներկայացնել

Հասցե՝ Հալաբյան 44,
Էլ. հասցե՝ [email protected]
Հեռ.՝ 010 35 39 15, 34 48 44, 34 56 36: