Ապրիլի 2-ին Սեյրան Օհանյանի մասնակցությամբ բացվել է հատուկ սպառազինության և ռազմական տեխնիկայի նոր արտադրամաս, որը հնարավորություն է ընձեռելու ուշադրություն դարձնել ՀՀ զինված ուժերի ՀՕՊ զորատեսակի հատուկ սարքերի, սպառազինության և ռազմական տեխնիկայի նորոգման գործընթացի վրա: Այս մասին տեղեկացնում է ՀՀ ՊՆ կայքը:
Հայաստանում հատուկ սպառազինության և ռազմական տեխնիկայի նոր արտադրամասի բացումը
Շրջելով նոր արտադրամասի տարածքում՝ պաշտպանության նախարարը ծանոթացել է շենքային պայմաններին, կատարված լայնածավալ աշխատանքներին, արտադրամասի տեխնիկական հագեցվածությանը, ինչպես նաև ոլորտի պատասխանատուների և մասնագետների հետ քննարկել է ընթացիկ ու հեռանկարային ծրագրերը:
Սեյրան Օհանյանին են ներկայացնում նոր արտադրամասի արտադրանքը
Ավելացնենք, որ նախորդ ամսվա ընթացքում երեք անգամ՝ մարտի 3-ին, մարտի 12-ին և մարտի 24-ին, ՀՀ պաշտպանության նախարար Սեյրան Օհանյանն այցելել է Հայաստանի ռազմարդյունաբերական ձեռնարկություններ, ծանոթացել հայրենական արտադրանքին: Բացի այդ, մարտի 17-ին ՀՀ ԶՈւ չորս զորամասեր կատարած այցի ընթացքում ևս նախարար Օհանյանին էր ներկայացվել հայրենական ռազմական արդյունաբերության արտադրանքներից ևս մեկը՝ հետևակի մարտական մեքենայի վարժասարքը:
Իսկ մարտի 25-ին ՀՀ Ազգային ժողովում 104 կողմ (2 դեմ, 6 ձեռնպահ) ձայներով երրորդ ընթերցմամբ և ամբողջությամբ ընդունվել է «ՀՀ ռազմարդյունաբերական համալիրի մասին» օրենքը, որը կարգավորում է Հայաստանում ռազմական արդյունաբերության գործունեությունը:
Pingback: Ռազմաշաբաթ․ Հայաստան․ 29 մարտի – 4 ապրիլի, 2015 | Ռազմ.info