Մարտի 30-ին ՀՀ զինված ուժերի գլխավոր շտաբի պետ, գեներալ-գնդապետ Յուրի Խաչատուրովն այցելել է երկրի հյուսիսարևմտյան հատվածում տեղակայված զորամասերից մեկը և անցկացրել պլանային ստուգումներ: Այս մասին հայտնում է ՀՀ ՊՆ տեղեկատվության վարչությունը։
ՀՀ ԶՈւ ԳՇ պետը՝ զինված ուժերի գլխավոր շտաբի պետի տեղակալ, գեներալ-լեյտենանտ Ստեփան Գալստյանի և վարչական ապարատի ղեկավար, գեներալ-մայոր Արիս Բրուտյանի ու բարձրաստիճան այլ սպաների ուղեկցությամբ շրջել է զորամասի տարածքում, հետևել ծառայության կազմակերպման ընթացքին, անհրաժեշտ փաստաթղթերի առկայությանը:
Զորամասում անցկացված հավաք-խորհրդակցության ընթացքում Յուրի Խաչատուրովը զրուցել է սպայական անձնակազմի հետ, ստուգել նրանց պարտականությունների իմացությունը, մատնանշել հայտնաբերված բացթողումները։
Խորհրդակցության ավարտին գեներալ-գնդապետ Յուրի Խաչատուրովը զորամասի հրամանատարությանը համապատասխան հրահանգներ և ցուցումներ է տվել ստուգումների ընթացքում արձանագրված բացթողումները կարճ ժամանակահատվածում շտկելու համար: