ԱՄՆ-ն սկսել է Ուկրաինա մատակարարել խոստացված ռազմական օգնությունը

Մարտի 25-ին ԱՄՆ օդուժի բեռնատար ինքնաթիռով Ուկրաինա են բերվել Միացյալ Նահանգների՝ Ուկրաինայի ուժայիններին տրամադրվելիք առաջին 10 միավոր HMMWV (Humvee) ռազմական զրահապատ մեքենաները: Առաջիկա շաբաթվա ընթացքում ամերիկյան կողմը մտադիր է Ուկրաինա ուղարկել ևս 30 մեքենա: Այս մասին հայտնում է Ուկրաինայում ԱՄՆ դեսպանության կայքը:

Միացյալ Նահանգների՝ Ուկրաինային տրամադրած Humvee զրահամեքենաների առաջին խմբաքանակը

Մեքենաների ստացման հանդիսավոր արարողությանը մասնակցել է նաև Ուկրաինայի նախագահ Պյոտր Պորոշենկոն, որն անձամբ է ընդունել մատակարարվող մեքենաները:

Մեքենաների տրամադրման մասին Միացյալ Նահանգները խոստացել էր մարտի կեսերին: Մարտի 12-ին հայտնի էր դարձել, որ ԱՄՆ-ն մտադիր է օգնել Ուկրաինայի կառավարական ուժերին՝ նրանց տրամադրելով ընդհանուր առմամբ 75 մլն ամերիկյան դոլարի ոչ մահացու սպառազինություն:

Ուկրաինայի նախագահ Պորոշենկոն ԱՄՆ-ի տրամադրած զրահամեքենայի վրա ամրացնում է ուկրաինական տարբերանշան

Տրամադրվող օգնության մեջ մտնում են ամերիկյան արտադրության RQ-11 Raven հետախուզական փոքր անօդաչու թռչող սարքեր (ԱԹՍ), 30 միավոր զրահապատ և ևս մոտ 200 միավոր ոչ զրահապատ HMMWV (Humvee, «Համվի») մեքենաներ, հակաականանետային ռադարներ, գիշերային դիտասարքեր, առաջին օգնության պարագաներ:

Լրատվամիջոցի աղբյուրը հայտնել է, որ ԱՄՆ-ն չի մատակարարում մահացու զինատեսակներ, քանի որ դա նման օգնությունը կավելացներ արյունահեղությունը տարածաշրջանում:

Մատակարարվող ոչ մահացու սպառազինության մեջ մտնող HMMWV (High Mobility Multipurpose Wheeled Vehicle – Բարձր շարժունակությամբ բազմանպատակային անվավոր մեքենա) թեթև զրահավորված մեքենաները, որոնք արտադրում է ամերիկյան AM General ընկերությունը, նախատեսված են հետախուզական կամ բարձր շարժունակությամբ (արագ արձագանքման) ստորաբաժանումների համար։ 2,6 տոննա զանգվածով մեքենաները կարող են տեղափոխել մինչև 2 տոննա բեռ, այդ թվում՝ նաև սպառազինություն։

1985-ից արտադրվող մեքենաներն ունեն մի շարք արդիականացումներ, որոնց վրա տեղադրված է տարբեր տեսակի սպառազինություն։ Զրահապատ մեքենաների միջին գինը շուրջ 140 հազար ամերիկյան դոլար է։ Մեծ կամ փոքր քանակությամբ այս մեքենաներից առկա է աշխարհի մոտ 70 երկրների զինված ուժերում։