Դաղստանում հակաահաբեկչական գործողության արդյունքում սպանվել է 7 զինյալ

Մարտի 21-ին Դաղստանի մայրաքաղաք Մախաչկալայում հայտարարվել էր հակաահաբեկչական գործողության ռեժիմ, որի ընթացքում  սպանվել է 7 զինյալ՝ 4 տղամարդ և 3 կին։ Վերջիններս թաքնվել էին հինգ հարկանի շենքում։

Նկարը` ՏԱՍՍ լրատվական գործակալության

Այս մասին հայտնում է ռուսաստանյան «ՏԱՍՍ» լրատվական գործակալությունը՝ հղում անելով Դաղստանի ազգային հակաահաբեկչական հանձնաժողովի շտաբին։

Ինչպես նշում է լրատվական գործակալությունը, հակաահաբեկչական հանձնաժողովի շտաբ հաղորդագրություն է եկել, որ Մախաչկալայի Լենինսկի շրջանի հինգ հարկանի շենքերից մեկում թաքնվում են մարտի 19-ին ոստիկանության վրա հարձակված զինված խմբավորման անդամները։

Հատուկ գործողությունների արդյունքում  հատուկ ծառայությունները նույն շենքում հայտնաբերել են ևս մեկ զինված խումբ։ Փոխհրաձգության արդյունքում 7 զինյալ (4 տղամարդ և 3 կին) ոչնչացվել է։ Միջադեպի վայրում հայտնաբերվել է 2 ինքնաձիգ։ Քաղաքացիական անձինք չեն տուժել։

Հայտնի է, որ հարուցվել է քրեական երկու գործ՝  «ոտնձգություն  իրավապահ մարմինների աշխատակիցների կյանքի նկատմամբ» և «զենք-զինամթերքի անօրինական շրջանառություն» հոդվածներով։

Հիշեցնենք, որ արդեն տևական ժամանակ է, ինչ Դաղստանում հակաահաբեկչական գործողության ռեժիմ է հայտարարվում, ինչի ընթացքում  ոչնչացվում են զինված խմբավորումների անդամներ։

Այսպիսով, 2015-ին Դաղստանում արդեն մի քանի անգամ հարձակումներ էին եղել ոստիկանության աշխատակիցների վրա։ Մասնավորապես՝ հունվարի 7-ին Խասավյուրտում անծանոթները կրակել էին ոստիկանների ուղղությամբ, ինչի հետևանքով 2 ոստիկան սպանվել էր, ևս 2-ը վիրավորվել։ Սպանվել էր նաև հարձակվողներից մեկը։

Նույն Խասավյուրտում հունվարի 15-ին գրանցվել էր մեկ այլ միջադեպ, որի ժամանակ սպանվել է զինված տղամարդ։ Եվս մեկ միջադեպ եղել էր հունվարի 27-ին, ոստիկանները ոչնչացրել են երկու զինյալի։

Փետրվարի 24-ին դարձյալ Խասավյուրտում զինյալները կրակել էին ոստիկանների ուղղությամբ, 2 զինյալ և 1 ոստիկան սպանվել էին, հարձակվողներից ևս մեկը կարողացել էր թաքնվել։

Մարտի 2-ին հայտնի դարձավ, որ  դեռևս փետրվարի 25-ից հակաահաբեկչական գործողության ռեժիմ հայտարարված  4 գյուղերում հանվել է  ռեժիմը։ Գործողությունների արդյունքում սպանվել է 7 զինյալ:

Մարտի 19-ին Մախաչկալայի ավաններից մեկում փոխհրաձգության արդյունքում մեկ ոստիկան և զինյալ  են վիրավորվել։