Երեկ՝ մարտի 8-ին, Վրաստանի պաշտպանության նախարարությունը հաղորդագրություն է տարածել, ըստ որի, ԱՄՆ-ի Նյու-Ջերսի նահանգում ավտովթարից զոհվել են վրաստանցի երկու կուրսանտ։ Վերջիններս սովորում էին ԱՄՆ առափնյա անվտանգության ռազմական ակադեմիայում։
Իրակլի Ալասանիան ավտովթարից զոհված կուրսանտների հետ
Նկարը՝ Ալասանիայի ֆեյսբուքյան էջից
Շարքային Սոսո Մակարիձեն ավարտական կուրսում էր սովորում, իսկ Բեսարիոն Գորջալաձեն ընդունվել է 2013 թվականին։
Ինչպես նշվում է հաղորդագրության մեջ, կուրսանտներից մեկը մահացել է տեղում, մյուսը՝ հոսպիտալում։ Մեքենայի վարորդն ԱՄՆ քաղաքացի է եղել։ Կատարվում է քննություն։
Պաշտպանության նախկին նախարար Իրակլի Ալասանիան ֆեյսբուքյան իր էջում մարտի 8-ին զինծառայողների հետ լուսանկար է հրապարակել ու գրել, որ անձամբ ճանաչել է նրանց։ «Այս տղաների կորուստն անփոխարինելի է Վրաստանի համար։ Ուսումն ավարտելուց հետո նրանք կվերադառնային հայրենիք որպես մասնագետներ, ինչն այնքան պետք է մեր զինված ուժերին»,- գրել է Ալասանիան։