Թուրքիան ռազմական օգնություն է ուղարկել Իրաք՝ որպես ներդրում ԻՊ-ի դեմ պայքարում

Թուրքիան մարտի 3-ին ռազմական օգնություն է ուղարկել Իրաք, որն  օգտագործվելու է «Իսլամական պետություն» ահաբեկչական կազմակերպության դեմ պայքարում։ Թուրքական օդուժի 2 միավոր C-130 բեռնատար ինքնաթիռները նշված օգնությունը  2 միավոր C-130 բեռնատար ինքնաթիռով հասցրել են Բաղդադի Մութեննա ռազմաօդային բազա։ Այս մասին հայտում է թուրքական «Անադուլու» պետական լրատվական գործակալությունը՝ հղում անելով Իրաքում Թուրքիայի դեսպան Ֆարուք Բայմաքչիին:

Ռազմական օգնություն առաքող թուրքական C-130 ռազմական ինքնաթիռը Բաղդադի Մութեննա ռազմաօդային բազայում

Իրաքում Թուրքիայի դեսպանը նաև հաստատել է, որ Թուրքիայի պաշտպանության նախարար Իսմեթ Յըլմազն այս շաբաթ՝ մարտի 4-ից 6-ը, լինելու է Իրաքում և այցելելու է երկրի կենտրոնական մայրաքաղաք Բաղդադ ու Հյուսիսային Իրաքի մայրաքաղաք Էրբիլ՝  հավելելով, որ Թուրքիան ԻՊ դեմ պայքարում շարունակելու է աջակցել միջազգային կոալիցիային և Իրաքին՝ «հանուն տարածաշրջանային խաղաղության վերականգման ու կայունության»։

Հավելենք՝ թուրքական ոչ պաշտոնական աղբյուրներն ավելի վաղ հայտնել էին, որ պաշտպանության նախարարի այցի շրջանակներում  կողմերը ստորագրելու են հետախուզական տեղեկություններ փոխանակելու վերաբերյալ երկկողմ պայմանագրեր:

Հիշեցնենք նաև, որ Իրաքում ահաբեկչական վտանգն առավել սուր բնույթ ստացավ 2014-ի հունիսին, երբ երկրի հյուսիսային հատվածը, մասնավորապես մեծությամբ երկրորդ քաղաք Մոսուլն անցավ «Իսլամական պետություն» ահաբեկչական կազմակերպության վերահսկողության տակ:

Ներկայումս ԱՄՆ գլխավորած միջազգային կոալիցիան պատրաստվում է Մոսուլի՝ ահաբեկիչներից ազատագրման գործողությանը, որին, հավանական է, կմիանա նաև Թուրքիան: Այս պահին, սակայն, հայտնի չէ Թուրքիայի՝ այդ գործողությանը մասնակցելու ձևաչափը: