Թուրքիայի վարչպետ Ահմեթ Դավութօղլուն 2015-ի փետրվարի 17-ին հայտարարել է, որ «Վճար ծառայության փոխարեն օրենքի շրջանակներում հավաքված 3մլրդ 368մլն թուրքական լիրան (մոտ 1,5մլրդ ԱՄՆ դոլար) ամբողջությամբ օգտագործվելու է Թուրքիայի պաշտպանական համակարգի արդիականացման համար։ Այս մասին հայտնում է թուրքական պետական «Անադոլու» լրատվական գործակալությունը։
Դավութօղլուն նշել է, որ օրենքի շրջանակներում ծառայությունից ազատված Թուրքիայի 200 հազար 308 քաղաքացիների վճարումներից հավաքված ողջ գումարը փոխանցվելու է Թուրքիայի «պաշտպանական արդյունաբերության հիմնադրամ»-ին և օգտագործվելու է Թուրքիայի պաշտպանական ոլորտի զարգացման համար։
Նա նշել է նաև, որ օրենքը մինչ այս ևս կիրառվել է՝ 1987, 1992, 1999 և 2002 թվականներին, ընդհանուր առմամբ սահմանված վճարի դիմաց ծառայությունից ազատվել է 193 հազար 147 քաղաքացի և արդյունքում հավաքվել է ավելի քիչ գումար, քան այս տարի։
Հավելենք, որ «գումար ծառայության փոխարեն» օրենքը Թուրքիայում կրկին ներդրվել էր դեռևս 2011-ին, սակայն այն ժամանակ ծառայությունից ազատվելու համար անհրաժեշտ էր վճարել 30 հազար թուրքական լիրա (մոտ 12,3 հազար ԱՄՆ դոլար), իսկ 2014-ի դեկտեմբերին կատարված փոփոխումներից հետո՝ 18 հազար լիրա (մոտ 7,6 հազար ԱՄՆ դոլար)։ Ծրագիրը մեկնարկել է 2014-ի դեկտեմբերի 13-ին և տևել երկու ամիս։
Հիշեցնենք, որ Թուրքիայի պաշտպանության նախարար Իսմեթ Յըլմազը 2015-ի փետրվարի 13-ին հայտարարել էր, որ «Գումար ծառայության փոխարեն» օրենքից օգտվել է Թուրքիայի մոտ 200 հազար քաղաքացի։
Տեղին է նշել նաև, որ 2014-ի դեկտեմբերի 19-ին վարչապետ Ահմեթ Դավութօղլուն հույս էր հայտնել, որ օրենքից կօգտվի 700 հազար քաղաքացի՝ նշելով, որ ծրագրից ստացված եկամուտները կփոխանցվեն Թուրքիայի պետական «Պաշտպանական հիմնադրամին» և կուղղվեն բանակի արդիականացմանը:
Pingback: Ռազմաշաբաթ. Թուրքիա. 15-21 փետրվարի, 2015 | Ռազմ.info