ՀՀ զինված ուժերում մեկնարկել է ուսումնական նոր փուլը

Ուսումնական նոր փուլի մեկնարկի կապակցությամբ փետրվարի 16-ին պաշտպանության նախարար Սեյրան Օհանյանն այցելել է 5-րդ բանակային զորամիավորման ենթակա սահմանային զորամաս, մեկ այլ զորամաս էլ այցելել է ԶՈւ ԳՇ պետ, գեներալ-գնդապետ Յուրի Խաչատուրովը:

Սեյրան Օհանյանն ուսումնական փուլի մեկնարկին

Զորամասի անձնակազմի ուղղած խոսքում Սեյրան Օհանյանը նշել է, որ հակառակորդի սադրիչ գործողություններին հակազդելու միակ միջոցը հայկական զինված ուժերի մարտական պատրաստականության բարձր աստիճանն է, և յուրաքանչյուրիս պարտքն է միացյալ ուժերով ուսումնական գործընթացը ծառայեցնել ի նպաստ ազգային բանակի մարտական պատրաստության աստիճանի հետագա բարձրացման:

Ձմեռային ուսումնական փուլի մեկնարկը տրված է

Սեյրան Օհանյանը հորդորել է գիտակցաբար մոտենալ ուսումնական փուլում ներառված մարտական պատրաստականության դասաժամերին, քանի որ անձնակազմի մարտական բարձր պատրաստվածությամբ է նաև պայմանավորված առկա հարաբերական խաղաղության հարատևությունը:

Փետրվարի 16-ին շահագործման է հանձնվել նաև պաշտպանության նախարարության միջոցներով կառուցված հերթական բնակելի շենքը` նախատեսված շուրջ 40 զինծառայողի և նրանց ընտանիքների համար:

Շուրջ 40 զինծառայող բնակարանամուտ է տոնել

Բանակային զորամիավորում կատարած շրջայցի ավարտին պաշտպանության նախարարը եղել է նաև զորամասի հիմնովին նորոգված, նոր գույքով ու տեխնիկական միջոցներով հագեցած ակումբում:

Հավելենք, որ ՊՆ և ԶՈւ ղեկավար կազմը ևս մասնակցել է 2015թ. ձմեռային ուսումնական փուլի մեկնակի կապակցությամբ ԶՈւ զորամասերում կազմակերպված հանդիսավոր միջոցառումներին: