Թուրքիայի ԶՈՒ ԳՇ պետ, բանակի գեներալ Նեջդեթ Օզելն ընդունել է երկրում Ղազախստանի դեսպան Ժանսեիտ Թույմեբաևին: Կողմերը քննարկել են մասնավորապես Թուրքիայի և Ղազախստանի ռազմական և ռազմատեխնիկական ոլորտներում համագործակցության ընդլայման հարցեր: Այս մասին փետրվարի 13-ին հայտնում է Ղազախստանի արտգործնախարարության կայքը:
Թուրքիայի ԶՈՒ ԳՇ պետ Նեջդեթ Օզելն ու Թուրքիայում Ղազախստանի դեսպան Ժանսեիտ Թույմեբաևը
Թուրքիայի ԶՈՒ ԳՇ պետը նշել է, որ Ղազախստանի հետ ռազմական ոլորտում համագործակցության հիմնական ուղղությունները Թուրքիայի ռազմամարզական կենտրոններում ղազախստանցի զինվորականների մարզումներն ու վերապատրաստումներն են և ղազախական ռազմական ստորաբաժանումների զինումը՝ որպես աջակցություն Ղազախստանում ընթացող ռազմական բարեփոխումների գործընթացին:
Նշենք, որ Ղազաղստանի և Թուրքիայի միջև ռազմարդյունաբերության ոլորտում համագործակցության վառ օրինակ է Թուրքական «Ասելսան» և ղազախական Kazakhstan Engineering ընկերությունների համատեղ ձեռնարկությունը՝ Kazakhstan Aselsan Engineering-ը (KAE), որը հիմնադրվել է 2013-ի դեկտեմբերին:
Միջկառավարական համաձայնագրերի համաձայն՝ ղազախստանցի զինվորականներն այսօր Թուրքիայում մարզումներ են անցնում «Կոմանդոս», «Հատուկ նշանակության ստորաբաժանումներ», «Դիպուկահարների վերապատրաստում», «Ներքին անվտանգություն», ինչպես նաև աերոմոբիլային զորքերի ստորաբաժանումների վերապատրաստման ծրագրերի շրջանակներում:
Հանդիպման արդյունքում կողմերը համաձայնել են էլ ավելի խորացնել առկա սերտ համագործակցությունը: