Ադրբեջանում մեկնարկել է ԶՈւ օպերատիվ-մարտավարական զորավարժություն

Այսօր՝ փետրվարի 2-ին, Ադրբեջանի ՊՆ մամուլի ծառայությունը հայտնել է, որ զինված ուժերում մեկնարկել է օպերատիվ-մարտավարական զորավարժություն, որում ներգրավված է շուրջ 15 հազարանոց ակտիվ անձնակազմ և 5 հազարանոց պահեստազոր։

Ադրբեջանի ԶՈւ ԳՇ պետ Նաջմեդդին Սադիկովը ծանոթանում է զորավարժության պլանին

Հայտնի է, որ զորավարժությունն անցկացվում է պաշտպանության նախարար Զաքիր Հասանովի և նրա առաջին տեղակալ, ԶՈւ գլխավոր շտաբի պետ, գեներալ-գնդապետ Նաջմեդդին Սադիկովի գլխավորությամբ։

Հաղորդագրությունում նշվում է նաև, որ վարժանքներում ընդգրկված է շուրջ 300 միավոր զրահատեխնիկա, ավելի քան 200 միավոր զենիթային և հրետանային կայան, ռազմաօդային ուժերի և հակաօդային պաշտպանության շուրջ 20 միջոց՝ այդ թվում զենիթահրթիռային համակարգեր։

Զորահավաքային ռեսուրսի օգտագործումը հարթ իրականացնելու նպատակով զորավարժությունում ներգրավվել է նաև 300 միավոր ավտոմոբիլային տեխնիկա պահեստազորից։

Մեկնարկած զորավարժության վերաբերյալ այլ մանրամասներ՝ ներառյալ դրա տևողությունն ու անցկացման վայրը, այս պահին հայտնի չեն։

Մեկնարկած զորավարժության մաս կազմող վրանային ավան