ՌԴ-ի հետ համաձայնագրով ուժային կառույցները շարունակելու են մնալ Հվ. Օսիայի ենթակայության տակ

2014-ի նոյեմբերի 24-ին ռուս-աբխազական համագործակցության և ռազմավարական գործընկերության պայմանագրի ստորագրումից հետո, նման համագործակցության պայմանագրի նախագծի մասին սկսեց խոսել նաև Հարավային Օսիան։

Հարավային Օսիայի նախագահ Լեոնիդ Թալիբով
Նկարը՝ ТАСС գործակալության

2015թ. հունվարի 30-ին այդ երկրի նախագահ Լեոնիդ Թալիբովը հայտարարեց, որ պայմանագրի նախագիծն արդեն ուղարկվել է Մոսկվա։ Ռուսաստանի հետ համագործակցության և ինտեգրացիայի մասին համաձայնագիրը, համաձայան Հարավային Օսիայի սահմանադրության և օրենքներին, պահպանելու է երկրի պետական բոլոր կառույցները։ Ինչպես հաղորդում է ռուսաստանյան ՌԻԱ Նովոստի լրատվական գործակալությունը, այս մասին հունվարի 30-ին մամուլի ասուլիսի ժամանակ հայտարարել է նախագահ Թալիբովը։

Նույն օրը կառավարության նիստի ժամանակ Հարավային Օսիայի նախագահը նշել է, որ ՌԴ-ի և Հվ. Օսիայի աշխատանքային խմբերն ավարտին են հասցրել «Համագործակցության և ինտեգրացիայի մասին համաձայնագիրը», և համաձայնեցված նախագիծն արդեն ուղարկվել է Մոսկվա։

Թալիբովը շեշտել է, որ ՌԴ ԱԳՆ ուղարկված համաձայնագրի նախագծի համաձայն, պաշտպանության նախարարությունը և ուժային մյուս կառույցները մնալու են Հարավային Օսիայի ենթակայության տակ։

«Ե´վ ՊՆ-ն, և´ ազգային անվտանգության կոմիտեն, և´ ՆԳՆ-ն մնում են մեր հսկողության տակ, և ես էլ մնում եմ գերագույն գլխավոր հրամանատար»,- ասել է Թալիբովը։

Հավելենք, որ  2014թ. նոյեմբերի 26-ին Հարավային Օսիայի նախագահի աշխատակազմի ղեկավար Բորիս Չոչիևը տեղական Ռես լրատվական գործակալությանը տված հարցազրույցում հայտարարել էր, որ «Երկրի ղեկավարությունը պետք է պաշտպանի իր ժողովրդին, այդ իսկ պատճառով նման խնդրանքով մենք դիմել ենք Ռուսաստանին, որպեսզի կնքենք նոր համաձայնագիր, որտեղ առաջին տեղում կլինի ռազմական դաշինքը, միացյալ զինված ուժերի ստեղծումը»։

Այս հարցազրույցին ի պատասխան  2014թ. դեկտեմբերի 8-ին Վրաստանի ԱԳՆ մամուլի քարտուղար Դավիդ Կերեսելիձեն հայտարարել էր, որ Թբիլիսին անպայման քայլեր կձեռնարկի Մոսկվայի և Ցխինվալի միջև կնքվելիք համաձայնագրին արձագանքելու համար։

Հիշեցնենք, որ 2014թ. նոյեմբերի 24-ին Ռուսաստանի ու Աբխազիայի նախագահները ստորագրել են ռուս-աբխազական համագործակցության և ռազմավարական գործընկերության պայմանագիրը՝ 10 տարի ժամկետով և երկարաձգման հնարավորությամբ։

Ընդհանուր առմամբ, համաձայնագրով նախատեսվում է, որ Ռուսաստանը հնարավորինս ամրապնդելու է Աբխազիայի միջազգային կապերը՝ աջակցելով նրա միջազգայնորեն ճանաչմանը։ Համաձայնագրում նշվում է նաև, որ եթե կողմերից մեկի նկատմամբ ագրեսիայի (ռազմական հարձակում) դրսևորում լինի, ապա դա կդիտվի «ագրեսիա (ռազմական հարձակում) համաձայնագրի մյուս կողմի երկրի նկատմամբ»։

Նախատեսվում է նաև ՌԴ և Աբխազիայի զինված ուժերի միացյալ զորքերի ստեղծում, որը կազմավորվելու է ոչ ուշ, քան համաձայնագրի ուժի մեջ մտնելուց 1 տարի անց։

Համաձայնագրի ուժի մեջ մտնելուց հետո 3 տարվա ընթացքում Ռուսաստանի միջոցներով աբխազական բանակն «արդիականացվելու է» ու բերվելու ռուսաստանյան բանակի չափանիշներին։ Իրականացվելու է նաև Աբխազիայի ԶՈւ անձնակազմի վերապատրաստում, ու համալրում ռազմական նոր տեխնիկայով։

Հավելենք, որ ռուս-աբխազական համաձայնագրի կնքումը քննադատեցին ՆԱՏՕ-ն, Եվրոպայի Խորհուրդը, ԱՄՆ-ն, ինչպես նաև Եվրամիության մի շարք երկրներ։