ՀՀ նախագահ, Հայաստանի զինված ուժերի գերագույն գլխավոր հրամանատար Սերժ Սարգսյանն Ամանորի և Սուրբ Ծննդյան տոների կապակցությամբ դեկտեմբերի 31-ին այցելել է հանրապետության հարավ-արևմտյան հատվածի սահմանագիծը պահող պաշտպանական տեղամասերից մեկը, հայտնում է նախագահի մամուլի ծառայությունը:
Նախագահ Սերժ Սարգսյանը սահմանապահ տեղամասերից մեկում
Դիրքերում նախագահը պարգևատրել է աչքի ընկած զինծառայողներին
Սերժ Սարգսյանին ուղեկցել են նաև Ամենայն Հայոց Կաթողիկոս Գարեգին Երկրորդն ու ՀՀ պաշտպանության նախարար Սեյրան Օհանյան։ Նախագահը հանդիպել է, շրջայց կատարել մարտական հենակետում և ծանոթացել ծառայության անցկացման, ինչպես նաև զինվորների կենցաղային պայմաններին:
Հանրապետության նախագահը ծառայության ընթացքում իրենց անձնվիրությամբ և խիզախությամբ աչքի ընկած զինծառայողներին՝ մի խումբ սպաների և զինվորների հանձնել է նվերներ: Սերժ Սարգսյանը տոնական սեղանի շուրջ զրուցել է զինվորների հետ, շնորհավորել Հայոց բանակի բոլոր զինծառայողներին գալիք տոների կապակցությամբ, հղել բարեմաղթանքներ և շնորհակալություն հայտնել անձնվեր ծառայության համար։
Հանրապետության նախագահը, Ամենայն հայոց կաթողիկոսն ու պաշտպանության նախարարը ծանոթացել են զինծառայողների կենցաղային պայմաններին
«Մեզնից յուրաքանչյուրին Աստված կամ ճակատագիրը հատկացնում է մի ժամանակահատված, որտեղ կարևորն ինքն է, որտեղ պատասխանատուն ինքն է՝ և՛ հայրենյաց հողի պաշտպանն է ինքը, և՛ երկրի կայունության պատասխանատուն է ինքը, բարեկեցության պատասխանատուն է ինքը: Այսօր այստեղ նստածներով, մեր ողջ զինված ուժերով պատասխանատուն մենք ենք: Այստեղ նստած քյավառցի տղայից սկսած վերջացրած գեներալներով պատասխանատուն մենք ենք և՛ Ղարաբաղի համար, և՛ Գյումրու համար, և՛ Լոռու համար, և՛ Արարատի համար, մեր հայրենի հողի համար: Բոլորիդ ուժ, կորով, կարողություն, որպեսզի այս պատասխանատու խնդիրը մեզ հատկացված ժամկետում մենք կատարենք պատվով»,— ասել է ՀՀ նախագահը։
Նախագահ Սերժ Սարգսյանը, Ամենայն Հայոց կաթողիկոս Գարեգին Երկրորդը, պաշտպանության նախարար Սեյրան Օհանյանն ու դիրքապահ զինծառայողները
Հյուրերը հանդիպել են մարտական դիրքում ծառայությունն անցկացնող զինվորներին և հրամանատարներին
Այսօր այստեղ նստածներով պատասխանատուն մենք ենք և՛ Ղարաբաղի համար, և՛ Գյումրու համար, և՛ Լոռու համար, և՛ Արարատի համար, մեր հայրենի հողի համար․ Սերժ Սարգսյան